اہم خبریں: گائے کچھ لوگوں کے لئے گناہ ہو سکتی ہے لیکن ہمارے لئے ماتا ہے، وزیر اعظم مودی

وزیر اعظم نریندر مودی آج بنارس کے دورے پر ہیں جہاں انہوں نے ’بنارس ڈیری سنکول‘ کا سنگ بنیاد رکھا۔ اس موقع پر وزیر اعظم مودی نے کہا کہ اس سے ڈیری شعبہ مضبوط ہوگا، جوکہ حکومت کی اولین ترجیحات میں شامل ہے۔ انہوں نے کہا، ’’کچھ لوگوں نے ایسے حالات پیدا کر دئے ہیں کہ گائے، گوبر دھن کی بات کرنا گناہ ہو گیا ہے۔ گائے کچھ لوگوں کے لئے گناہ ہو سکتی ہے لیکن ہمارے لئے گائے ماتا ہے۔

پرینکا گاندھی نے کہا، ’’یوگی آدتیہ ناتھ نے کہا ہے کہ مندر ٹرسٹ کی زمین خرید کی وہ جانچ کرائیں گے لیکن وہ جانچ ضلع مجسٹریٹ سطح پر ہو رہی ہے۔ رام مندر ٹرسٹ کو ہائی کورٹ کے حکم پر تشکیل دیا گیا تھا لہذا جانچ بھی ہائی کورٹ سطح پر ہونی چاہئے۔‘‘

انہوں نے کہا کہ ایودھیا میں رام مندر کے آس پاس کی زمین کی لوٹ مار چل رہی ہے۔ بی جے پی کے لیڈران، عہدیداران اور یوگی حکومت کے سرکاری افسران لوٹ میں شامل ہیں۔ بھگوان رام اخلاقات کی علامت تھے اور سچائی کے راستہ پر چلتے تھے لیکن ان کے نام پر بھی بدعنوانی کی جا رہی ہے۔ یہ ایک سنگین مسئلہ ہے۔

پرینکا گاندھی نے پریس کانفرس سے کہا کہ ایودھیا میں رام مندر ٹرسٹ نے جو زمینیں خریدی ہیں اس میں دھاندلی ہوئی ہے۔ ٹرسٹ نے گھر گھر جا کر چندہ جمع کیا تھا۔ دلتوں کی زمین جو خریدی نہیں جا سکتی تھیں انہیں ہڑپا گیا ہے اور کم داموں کی زمین ٹرسٹ کی طرف سے مہنگے داموں میں فروخت کی گئی، یعنی کہ چندہ کی رقم کو خرد برد کیا گیا۔

کانگریس کی جنرل سکریٹری اور پارٹی کی یوپی انچارج پرینکا گاندھی کچھ دیر بعد پریس کانفرنس سے خطاب کرنے جا رہی ہیں۔ پارٹی کی جانب سے جاری کی گئی اطلاع کے مطابق پرینکا گاندھی دہلی میں واقع کانگریس کے صدر دفتر سے دوپہر 12.30 بجے صحافیوں سے خطاب کریں گی۔ اس دوران وہ اہم موضوع پر بیان دیں گی۔

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا وائرس کے 7495 نئے معاملوں کی تصدیق کی گئی ہے۔ اس دوران 6960 افراد نے شفایابی حاصل کر لی جبکہ 434 افراد لقمہ اجل بن گئے۔