اہم خبریں: پرگتی میدان میٹرو اسٹیشن کا نام بدلنے کا فیصلہ، نیا نام ہوگا ’سپریم کورٹ‘

کیجریوال حکومت نے پرگتی میدان میٹرو اسٹیشن کا نام بدل دیا ہے۔ اب یہ میٹرو اسٹیشن ’سپریم کورٹ‘ کے نام سے جانا جائے گا۔ دہلی حکومت کی نام رکھنے والی کمیٹی نے اس سلسلے میں فیصلہ لیا ہے۔ دہلی کے نائب وزیر اعلیٰ منیش سسودیا نے یہ جانکاری آج میڈیا کو دی۔ پرگتی میدان کے علاوہ بھی دو میٹرو اسٹیشنوں کا نام تبدیل کیا گیا ہے۔ مکربا چوک کو شہید وکرم بترا چوک نام دیا گیا ہے جب کہ بدرپور-مہرو روڈ کا نیا نام آچاریہ شری مہاپرگیا مارگ ہوگا۔

دہلی کی غیر قانونی یا غیر مستقل کالونیوں کو مستقل کرنے سے متعلق مرکز کی مودی حکومت نے عواج سے جھوٹ بولا ہے۔ یہ دعویٰ عام آدمی پارٹی نے کیا ہے۔ عآپ لیڈر سنجے سنگھ کا کہنا ہے کہ ’’بی جے پی نے 22 تاریخ کی ریلی میں غیر مستقل کالونیوں کے لوگوں کو مالکانہ حق دینے کے لیے بلا لیا، لیکن انھیں خالی ہاتھ واپس بھیج دیا۔‘‘ سنجے سنگھ نے مزید کہا کہ ’’ڈی ڈی اے کی ویب سائٹ پر لکھا گیا ہے کہ کوئی بھی غیر قانونی کالونی مستقل نہیں ہو رہا ہے، نہ کسی کو رجسٹری دے کر مالکانہ حق دیا جا رہا ہے۔‘‘

مہاراشٹر کے گڑھ چرولی میں پولس کے سامنے آج تین خواتین سمیت پانچ نکسلیوں نے خود سپردگی کر دی۔ ان پانچوں نکسلیوں کے سر پر مجموعی طور پر 27 لاکھ روپے کا انعام تھا۔

ایک طرف پورے ملک میں نومنظور شہریت ترمیمی قانون کے خلاف احتجاجی مظاہرے چل رہے ہیں اور دوسری طرف کیرالہ اسمبلی میں اس قانون کے خلاف قرارداد پاس ہونے کی خبریں موصول ہو رہی ہیں۔ میڈیا ذرائع کے مطابق کیرالہ اسمبلی میں 31 دسمبر کو اس قانون کے خلاف قرارداد پاس ہوا۔

ائیر انڈیا کے پرائیویٹائزیشن یعنی نجکاری کے تعلق سے مرکزی وزیر برائے شہری ہوابازی ہردیپ سنگھ پوری نے ایک بڑا بیان دیا ہے۔ انھوں نے میڈیا سے بات چیت کرتے ہوئے کہا کہ ’’میں نے یہ بات پہلے بھی کہا تھا کہ ائیر انڈیا کی نجکاری ضروری ہے۔ ہمارے پاس اس کے علاوہ کوئی دوسرا متبادل نہیں ہے۔‘‘

دہلی واقع سیلم پور علاقہ میں گزشتہ دنوں ہوئے تشدد کے بعد کچھ افراد کو گرفتار کیا گیا تھا۔ گرفتار دو ملزمین کو دہلی کی ایک عدالت نے تین ہفتے کے لیے عبوری ضمانت دے دی ہے۔

این سی پی سربراہ شرد پوار نے مغربی بنگال کی وزیر اعلیٰ ممتا بنرجی کو ایک خط لکھا ہے۔ اس خط میں انھوں نے شہریت ترمیمی قانون کے خلاف مغربی بنگال میں جاری احتجاجی مظاہرہ کی حمایت کی ہے۔

مہاراشٹر کی ادھو حکومت کی توسیع 30 دسمبر کو ہوئی تھی جس میں کانگریس کے اراکین اسمبلی نے وزارتی عہدہ کا حلف لیا تھا۔ آج کانگریس کے سبھی وزراء نے کانگریس کے سابق صدر اور رکن پارلیمنٹ راہل گاندھی سے ان کی رہائش گاہ پر ملاقات کی۔ اس ملاقات کے دوران کانگریس کے سینئر لیڈر ملکارجن کھڑگے اور کے سی وینوگوپال بھی موجود تھے۔

دہلی میں آج بھی درجہ حرارت کافی کم درج کیا گیا ہے۔ لودی روڈ میں جہاں درجہ حرارت 3.7 ڈگری درج کیا گیا، وہیں پالم میں درجہ حرارت 4.1 ڈگری سلسیس درج کیا گیا۔ دہلی اور اس کے قرب و جوار میں ٹھنڈ میں لگاتار اضافہ ہوتا جا رہا ہے اور سرد لہر بھی چل رہی ہے۔ اس بڑھتی سردی کی وجہ سے لوگوں نے خود کو گھروں میں قید رکھنا شروع کر دیا ہے۔ دفاتر میں کام کرنے اور ضروری کام سے ہی لوگ باہر نکل رہے ہیں۔

پین (PAN) اور آدھار لنکنگ کی طے شدہ مدت میں ایک بار پھر اضافہ کر دیا گیا ہے۔ میڈیا ذرائع سے موصول ہو رہی خبروں کے مطابق اب 31 مارچ 2020 تک آدھار کارڈ سے پین کو لنک کرایا جا سکتا ہے۔ اس سے قبل لوگوں کو بتایا گیا تھا کہ آدھار کارڈ سے پین لنک کرنے کی آخری تاریخ 31 دسمبر 2019 ہے، جو کہ آج ختم ہو رہی تھی۔