پاکستان کی فوج نے راجوری ضلع کے سندر بنی سیکٹر میں جنگ بندی کی خلاف ورزی کرتے ہئے گولہ باری کی۔ پاکستان کی اس حرکت کا ہندوسانی فوجیوں نے منھ توڑ جواب دیا ہے۔ دونوں طرف سے زبرست فائرنگ کی خبریں ہیں۔ فوج کے ذرائع کا کہنا ہے کہ ہندوستان اور پاکستان کی فوج نے آج سندر بنی سیکٹر میں کنٹرول لائن کے ساتھ زبردست گولی باری کی۔ پاکستانی فوج ہندوستان کے اندر دراندازی کرانے کی کوشش کر رہے تھے۔ اس درمیان دونوں جانب سے زبردست گولی باری ہوئی اور یہ سلسلہ جاری ہے۔
Published: 16 Dec 2019, 9:32 AM IST
بی جے پی کے قومی صدر امت شاہ نے جھارکھنڈ اسمبلی الیکشن کے مدنظر پاکوڑ میں جلسہ عام سے خطاب کرتے ہوئے رام مندر تعمیر سے متعلق ایک بڑا بیان دیا ہے۔ امت شاہ نے کہا کہ 4 مہینے کے اندر ایودھیا میں رام مندر بننے جا رہا ہے۔ انھوں نے واضح لفظوں میں کہا کہ ابھی کچھ وقت پہلے ہی سپریم کورٹ نے ایودھیا کے لیے فیصلہ سنایا۔ 100 سالوں سے دنیا بھر کے ہندوستانیوں کا مطالبہ تھا کہ وہاں رام جنم بھومی پر عظیم الشان رام مندر بننا چاہیے۔ رام مندر کے دہائیوں پرانے مطالبہ کا تذکرہ کرتے ہوئے مرکزی وزیر داخلہ امت شاہ نے کہا کہ ہر کوئی رام مندر کی تعمیر چاہتا تھا، لیکن کانگریس اور اس کے وکیل عدالت میں اس کے سامنے رخنہ پیدا کرتے رہتے تھے۔ شاہ نے کہا کہ ’’کانگریس کے لیڈر اور وکیل کپل سبل عدالت میں کہتے تھے کہ ابھی کیس مت چلائیے، کیوں بھائی آپ کے پیٹ میں درد کیوں ہو رہا ہے؟‘‘
بی جے پی نے اپنے ٹوئٹر ہینڈل پر بھی امت شاہ کا رام مندر سے متعلق بیان ٹوئٹ کیا ہے۔ اس میں لکھا گیا ہے کہ ’’میں آپ سے کہنا چاہتا ہوں کہ سپریم کورٹ کا فیصلہ آ گیا ہے، 4 ماہ کے اندر آسمان کو چھوتا ہوا عظیم الشان رام مندر ایودھیا میں بننے جا رہا ہے۔‘‘
Published: 16 Dec 2019, 9:32 AM IST
پیر کے روز ایک 23 سالہ لڑکی نے اناؤ ایس پی دفتر کے باہر خودکشی کی کوشش کی۔ خبروں کے مطابق عصمت دری متاثرہ ایک لڑکی نے خود پر کیروسین چھڑک کر آگ لگا لی۔ موقع پر موجود پولس اہلکاروں نے فوراً اس خاتون کو ضلع اسپتال پہنچایا جہاں اس کی سنگین حالت کو دیکھتے ہوئے کانپور کے ہیلیٹ اسپتال ریفر کر دیا گیا۔
اناؤ کے پولس انسپکٹر وکرانت ویر سنگھ نے بتایا کہ خاتون نے 2 اکتوبر کو عصمت دری کا معاملہ درج کروایا تھا۔ معاملے میں ملزم اور خاتون کے درمیان طویل مدت سے جان پہچان تھی۔ نوجوان نے اسے شادی کا جھانسہ دے کر اس کا استحصال کیا اور بعد میں وہ شادی سے پیچھے ہٹ گیا جس کے بعد خاتون نے تھانہ حسن گنج میں عصمت دری کا معاملہ درج کروایا تھا۔ کچھ ہی دنوں پہلے ملزم کو الٰہ آباد ہائی کورٹ سے اس معاملے میں پیشگی ضمانت ملی تھی۔
Published: 16 Dec 2019, 9:32 AM IST
سابق بی جے پی رکن اسمبلی کلدیپ سنگھ سینگر کے لیے بری خبر سامنے آ رہی ہے۔ دہلی کے تیس ہزاری کورٹ نے اناؤ عصمت دری اور اغوا معاملہ میں سینگر کو قصوروار قرار دیا ہے۔ میڈیا ذرائع کے مطابق سینگر کے لیے سزا کا اعلان آئندہ 19 دسمبر کو کیا جائے گا۔
Published: 16 Dec 2019, 9:32 AM IST
الٰہ آباد ہائی کورٹ نے اعظم خان کے بیٹے عبداللہ اعظم خان کو فرضی حلف نامہ سے متعلق ایک معاملے کی سماعت کے دوران ریاستی اسمبلی کی رکنیت ختم کرنے کا حکم سنایا ہے۔ عبداللہ اعظم رام پور سے رکن اسمبلی تھے۔
Published: 16 Dec 2019, 9:32 AM IST
نئی دہلی: سپریم کورٹ جامعہ ملیہ اسلامیہ اور علی گڑھ مسلم یونیورسٹی میں ہوئے مبینہ بربریت کی کارروائی کی شکایت کے سلسلے میں منگل کو سماعت کرےگا، بشرطیکہ تشدد رکے۔ سینئر وکیل اندرا جے سنگھ نے جامعہ اور اے ایم یو میں ہوئے واقعات کا چیف جسٹس ایس اے بوبڑے، جسٹس بی آر گگوئی اور جسٹس سوریہ کانت کی بنچ کے سامنے واضح کیا۔
سینئر وکیل اندرا جے سنگھ نے سپریم کورٹ سے کہا کہ انہیں اس معاملے میں نوٹس لینا چاہیے۔ انہوں نے کہا کہ یہ پورے ملک میں ہو رہی انسانی حقوق کی خلاف ورزی ہے۔ جسٹس بوبڑے نے کہا، ’’ہم حقوق کا تعین کریں گے لیکن فسادات کے ماحول میں نہیں، یہ سب بند ہوجانا چاہیے اور پھر ہم اس پر خود نوٹس لیں گے۔ ہم حقوق اور پرامن مظاہروں کے خلاف نہیں ہیں۔‘‘
سینئر وکیل کولین گونسالوز نے کہا،’’عدالت کے ایک ریٹائرڈ جج کو جامعہ معاملے کی جانچ کرنی چاہیے۔‘‘جب ایک وکیل نے عدالت سے کہا کہ ان کے پاس معاملے سے متعلق ویڈیو ہیں تو چیف جسٹس نے کہا،’’ہم کوئی ویڈیو نہیں دیکھنا چاہتے۔ اگر پبلک پراپرٹی کا نقصان اور تشدد جاری رہا تو ہم اسے نہیں سنیں گے۔‘‘
انہوں نے کہا،’’یہ معاملہ تشدد رکنے کے بعد 17 دسمبر کو سنا جائے گا۔ انہوں نے دہلی پولس کو ہدایت دی ہے کہ وہ امن و قانون سنبھالے۔‘‘ اس کے ساتھ ہی سی جے آئی نے واضح طور پر کہا،’’اگر کسی بھی طرح کا تشدد ہوا تو ہم پھر آپ کے لئے کچھ نہیں کریں گے۔‘‘
Published: 16 Dec 2019, 9:32 AM IST
جامعہ ملیہ اسلامیہ کی وائس چانسلر نجمہ اختر نے ایک پریس کانفرنس کرتے ہوئے واضح کر دیا ہے کہ پولس نے جس طرح کا رویہ جامعہ طلبا کے خلاف اختیار کیا ہے اس کو دیکھتے ہوئے پولس کے خلاف ایف آئی آر درج کرایا جائے گا۔ انھوں نے کہا کہ پولس نے بغیر اجازت یونیورسٹی کیمپس میں انٹری کی جسے فراموش نہیں کیا جا سکتا۔ نجمہ اختر نے اس پورے واقعہ کی اعلیٰ سطحی جانچ کا مطالبہ بھی کیا۔
Published: 16 Dec 2019, 9:32 AM IST
جامعہ ملیہ یونیورسٹی کے طلباء ایک طرف اپنے ساتھیوں پر پولس کی بربریت کے خلاف احتجاجی مظاہرہ کر رہے ہیں اور دوسری طرف جامعہ کی ایگزیکٹیو کونسل کی میٹنگ شروع ہو گئی ہے۔ میٹنگ میں وائس چانسلر دفتر میں چل رہی ہے جہاں وائس چانسلر نجمہ اختر بھی موجود ہیں۔ اس میٹنگ میں اتوار کے روز طلبا پر ہوئی پولس لاٹھی چارج پر بات چیت چل رہی ہے۔ قابل ذکر ہے کہ وائس چانسلر نجمہ اختر نے پہلے ہی ایک ویڈیو پیغام میں صاف کر دیا ہے کہ پولس بغیر اجازت یونیورسٹی میں داخل ہوئی اور طلبا کے ساتھ انھوں نے جو برا سلوک کیا، وہ ناقابل فراموش ہے۔ انھوں نے ساتھ ہی یہ بھی کہا کہ طلباء اکیلے نہیں ہیں بلکہ وہ بھی ان کے ساتھ کھڑی ہیں۔
Published: 16 Dec 2019, 9:32 AM IST
ماڈل اور اداکار پایل روہتگی کو عدالت نے 8 دن کی عدالتی حراست میں بھیج دیا گیا ہے۔ گزشتہ دن انھیں پولس نے سابق وزیر اعظم پنڈت جواہر لال نہرو کے خلاف قابل اعتراض بیان دینے کے لیے گرفتار کیا تھا۔ آج راجستھان میں بوندی کی مقامی عدالت میں اس سلسلے میں سماعت ہوئی جہاں عدالت نے انھیں 8 دن کی عدالتی حراست میں بھیجنے کا حکم صادر کیا۔
Published: 16 Dec 2019, 9:32 AM IST
لکھنؤ واقع دارالعلوم ندوۃ العلماء میں طلبا و پولس کے درمیان تصادم کی خبریں موصول ہو رہی ہیں۔ میڈیا ذرائع کے مطابق جامعہ ملیہ اسلامیہ کے طلبا کے خلاف دہلی پولس کی بربریت سے ناراض ندروۃالعلماء کے طالب علم مظاہرہ کر رہے تھے جب ندوۃ العلماء کے دروازے پر مقامی پولس نے انھیں روکنے کی کوشش کی۔ پولس سے ناراض طلباء نے ان پر پتھراؤ شروع کر دیا اور حیرانی کی بات یہ ہے کہ ہیلمٹ پہنے پولس والوں نے بھی طلبا پر دروازے کے باہر سے پتھراؤ کیا۔
Published: 16 Dec 2019, 9:32 AM IST
مہاراشٹر کے بی جے پی اراکین اسمبلی اپنے سر پر ’میں بھی ساورکر‘ لکھی ٹوپی پہن کر اسمبلی کے سرمائی اجلاس میں شریک ہونے کے لیے پہنچے ہیں۔ انھوں نے بھگوا رنگ کی یہ ٹوپی پہن کر کانگریس لیڈر راہل گاندھی کے اس بیان پر ناراضگی ظاہر کی ہے جس میں انھوں نے کہا تھا کہ ’’میرا نام راہل ساورکر نہیں، راہل گاندھی ہے۔‘‘ قابل ذکر یہ ہے کہ مہاراشٹر کے سابق وزیر اعلیٰ دیویندر فڑنویس بھی ’میں بھی ساورکر‘ لکھی ٹوپی پہن کر پہنچے ہیں۔
Published: 16 Dec 2019, 9:32 AM IST
جھارکھنڈ میں چوتھے مرحلے کی 15 اسمبلی سیٹوں کے لئے سخت سکیورٹی انتظامات کے درمیان آج صبح سات بجے پولنگ شروع ہو گئی، جو شام پانچ بجے تک چلے گی۔ ریاستی الیکشن دفتر ذرائع نے یہاں بتایا کہ چوتھے مرحلے کے لئے مدھوپور، دیوگھر (ریزرو)، بگودر، جموا ( ریزرو)، گندے، گریڈیہہ، ڈمری، بوکارو، چندركياری ( ریزرو )، سندري، نرسا، دھنباد، جھریا، ٹنڈی اور باگھ مارا میں سخت حفاظتی انتظامات کے درمیان آج صبح سات بجے پولنگ شروع ہو گئی، جو میں شام پانچ بجے تک چلے گی۔ ان پندرہ سیٹوں میں سے بگود، جموا، گریڈیہہ، ڈمري اور ٹنڈی اسمبلی حلقہ میں صبح سات بجے سے شام تین بجے تک رائے دہندگان اپنے ووٹ کے حق کا استعمال کر سکیں گے۔ وہیں، مدھو پور، دیوگھر، گنڈے، بوکارو، چندن كياري، سندری، نرسا، دھنباد، جھریا اور باگھ مارا سیٹ کے لئے صبح سات سے شام پانچ بجے تک پولنگ ہوگی۔ جن اسمبلی سیٹوں کے لیے ووٹنگ کے اختتام کا وقت شام تین اور پانچ بجے تک ہے، وہاں اس وقت تک موجود تمام ووٹر ووٹ ڈال سکیں گے۔
Published: 16 Dec 2019, 9:32 AM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 16 Dec 2019, 9:32 AM IST