ایران میں مقیم شہریوں کے لیے ہندوستانی سفارت خانہ کی ایڈوائزری جاری، محتاط رہنے کی تلقین

اسرائیل-ایران کے درمیان جاری جنگ میں کئی ہندوستانی شہری ایران میں پھنس گئے ہیں۔ ایران میں واقع ہندوستانی سفارت خانہ نے ہندوستانی شہریوں کے لیے اتوار (15 جون) کو ایک ایڈوائزری جاری کی ہے۔ ایڈوائزری میں ہندوستانی سفارت خانہ نے ہندوستانی شہریوں سے کہا کہ گھبرائیں نہیں، محتاط رہیں اور ایران کی راجدھانی تہران میں واقع ہندوستانی سفارت خانہ کے رابطہ میں رہیں۔

ہندوستانی سفارت خانہ نے ایڈوائزری میں یہ بھی کہا کہ محتاط رہنے کے ساتھ ساتھ تمام غیر ضروری سرگرمیوں سے گریز کریں، سفارت خانہ کے سوشل میڈیا اکاؤنٹس پر نظر رکھیں اور مقامی افسران کی جانب سے دی گئی صلاح کے مطابق حفاظتی پروٹوکول پر عمل کریں۔ ساتھ ہی ہندوستانی سفارت خانہ نے سوشل میڈیا پلیٹ فارم ’ایکس‘ کے آفیشیل اکاؤنٹ پر ایک گوگل فارم شیئر کیا اور تمام ہندوستانی شہریوں سے فارم پُر کر کے اپنی تفصیلی معلومات فراہم کرنے کے لیے کہا ہے۔ ساتھ ہی ہندوستانی مشن نے ایمرجنسی صورتحال کے پیش نظر کچھ فون نمبر بھی جاری کیے ہیں۔

دوسری جانب تہران میں واقع ہندوستانی سفارت خانہ نے ایک ٹیلی گرام لنک بھی دستیاب کرایا ہے اور ہندوستانی شہریوں سے کہا کہ وہ سفارت خانہ سے صورتحال کے بارے میں تازہ ترین معلومات حاصل کرنے کے لیے اس میں شامل ہوں۔ ساتھ ہی ہندوستانی سفارت خانہ نے سوشل میڈیا پلیٹ فارم ’ایکس‘ پر لکھا کہ ’’براہ کرم اس بات کا خیال رکھیں کہ یہ ٹیلی گرام لنک صرف ان ہندوستانی شہریوں کے لیے ہے جو فی الحال تہران میں ہیں۔‘‘