بہار بند: ’یہ بہار ہے، یہاں عوام اپنا ووٹ چھننے نہیں دیں گے‘، پٹنہ میں راہل گاندھی کا بیان

بہار میں اپوزیشن کے ’انڈیا اتحاد‘ نے الیکشن کمیشن کے اسپیشل انٹینسیو رویژن (ایس آئی آر) یعنی ووٹر لسٹ میں نظرثانی کی مہم کے خلاف ریاست گیر چکہ جام اور بہار بند کا اعلان کیا ہے۔ آر جے ڈی، کانگریس، بائیں بازو کی جماعتیں، وی آئی پی پارٹی اور پپو یادو کی قیادت والی جن ادھیکار پارٹی سمیت مہاگٹھ بندھن کی تمام حلیف جماعتیں اس احتجاج میں شریک ہیں، جو انڈیا اتحاد کا بھی حصہ ہیں۔ راہل گاندھی بھی آج پٹنہ پہنچ رہے ہیں اور وہ تیجسوی یادو کے ساتھ مل کر انکم ٹیکس گولمبر سے انتخابی دفتر تک مارچ کی قیادت کریں گے۔

ہم یہاں بہار میں آج کے چکہ جام سے جڑی تمام اہم پیشرفت لمحہ بہ لمحہ آپ تک پہنچا رہے ہیں:

چکہ جام کے دوران انڈیا اتحاد کے مارچ سے خطاب کرتے ہوئے قائد حزبِ اختلاف راہل گاندھی نے انتخابی فہرستوں کی نظرثانی کو جمہوری حقوق پر حملہ قرار دیا۔ انہوں نے کہا، ’’ہم بہار آئے ہیں، یہ وہ ریاست ہے جہاں لوگ آئین کے لیے قربان ہوئے۔ ہمارے آئین میں صاف لکھا ہے کہ ہندوستان کے ہر شہری کو ووٹ دینے کا حق ہے۔‘‘

راہل گاندھی نے بی جے پی پر مہاراشٹر کے بعد اب بہار میں انتخاب چوری کرنے کی سازش کا الزام عائد کیا۔ ان کے مطابق، ’’جیسے مہاراشٹر کا الیکشن چوری کیا گیا، ویسے ہی اب بہار میں بھی ویسا ہی منصوبہ بنایا جا رہا ہے۔‘‘ انہوں نے مزید کہا کہ بی جے پی کو اندازہ ہو چکا ہے کہ انڈیا اتحاد نے ’مہاراشٹر ماڈل‘ سمجھ لیا ہے، اس لیے اب وہ ’بہار ماڈل‘ لے کر آئے ہیں، جس کا مقصد صرف اور صرف غریبوں سے ووٹ کا حق چھیننا ہے۔ میں راہل گاندھی نے زور دیتے ہوئے کہا، ’’لیکن انہیں نہیں معلوم کہ یہ بہار ہے اور بہار کے عوام ایسا کبھی نہیں ہونے دیں گے۔‘‘

انتخابی فہرستوں (الیکٹورل رولز) کی نظرثانی (ایس آئی آر) کے خلاف چکہ جام کے دوران انڈیا اتحاد کی قیادت نے اس مہم کو ’ووٹ بندی‘ کی سازش قرار دیتے ہوئے حکومت پر زوردار حملہ کیا۔ قائد حزبِ اختلاف راہل گاندھی نے پٹنہ میں مارچ میں شرکت کی۔ جس کی ویڈیو شیئر کرتے ہوئے لکھا کہ بہار کے کروڑوں ووٹروں سے ان کا حقِ رائے دہی چھیننے کی سازش کی جا رہی ہے، جس میں جے ڈی یو-بی جے پی حکومت انتخابی کمیشن کے ساتھ مل کر شامل ہے۔

انہوں نے الزام لگایا کہ یہ سازش خاص طور پر دلتوں، پسماندہ طبقات اور اقلیتوں کو ووٹر لسٹ سے خارج کرنے کے لیے رچی جا رہی ہے تاکہ ان کا جمہوری حق چھینا جا سکے۔ راہل گاندھی نے اسے بابا صاحب کے آئین پر براہ راست حملہ قرار دیتے ہوئے کہا کہ انڈیا اتحاد اس ناانصافی کے خلاف ہر سطح پر جدوجہد جاری رکھے گا اور کسی بھی قیمت پر اسے برداشت نہیں کیا جائے گا۔ مارچ میں ہزاروں کارکنان نے شرکت کی اور ’جمہوریت بچاؤ‘ کے نعرے لگائے۔

بہار بند کے تحت پٹنہ میں انڈیا اتحاد کی جانب سے ہونے والے احتجاج کے دوران قائد حزبِ اختلاف راہل گاندھی بذات خود احتجاجی مارچ کی قیادت کرنے جا رہے ہیں، مارچ کچھ دری میں شروع ہوگا اور موقع پر بھاری جم غفیر دیکھا جا سکتا ہے۔ مارچ انکم ٹیکس گولمبر سے بہار کے چیف الیکشن آفس کی طرف روانہ ہوپگا، جہاں تیجسوی یادو اور دیگر اپوزیشن رہنما بھی راہل گاندھی کے ہمراہ ہوں گے۔

مارچ میں شرکت کے لیے پہنچے کارکنان نے ہاتھوں میں تختیاں، بینر اور جھنڈے اٹھا رکھے تھے جن پر ’فہرستوں کی نظر ثانی بند کرو‘ اور ’جمہوریت بچاؤ‘ جیسے نعرے درج ہیں۔

چکہ جام کے تحت پٹنہ کے سیکریٹریٹ ہالٹ ریلوے اسٹیشن پر کانگریس کارکنوں نے ریلوے ٹریک پر دھرنا دیا۔ مظاہرین نے ٹرینوں کی آمدورفت روک دی، جس سے کئی لوکل اور پسنجر ٹرینیں تاخیر کا شکار ہو گئیں۔ کانگریس کارکنوں کا الزام ہے کہ الیکشن کمیشن کی جانب سے جاری ایس آئی آر مہم کے تحت لاکھوں اہل ووٹرز کے نام ووٹر لسٹ سے کاٹے جا رہے ہیں، جس میں دلت، مسلمان، آدیواسی اور مہاجر مزدور سب سے زیادہ متاثر ہو رہے ہیں۔ احتجاجی کارکنوں نے انتخابی عمل کو غیر منصفانہ قرار دیتے ہوئے حکومت اور الیکشن کمیشن کے خلاف نعرے بازی کی۔

ایس آئی آر یعنی اسپیشل انٹینسیو ریویژن، الیکشن کمیشن کی جانب سے ووٹر لسٹوں کی ایک خصوصی جانچ ہے، جو اس وقت بہار میں چلائی جا رہی ہے۔ اس عمل میں ووٹروں کی شناخت کی دوبارہ تصدیق لی جا رہی ہے لیکن اپوزیشن کا الزام ہے کہ اس میں ان لوگوں اور خاص کر دلت، مسلمان، آدیواسی، اور مہاجر مزدور کے ساتھ ناانصافی کی جا رہی ہے جنہوں نے 2024 میں ووٹ دیا تھا۔ اعتراض ہے کہ آدھار یا راشن/منریگا کارڈ جیسے عام شناختی دستاویزات بھی قبول نہیں کیے جا رہے ہیں، جبکہ نئے ضوابط کے تحت مقامی رہائش کا ثبوت بھی طلب کیا جا رہا ہے، حالانکہ مہاجر مزدور اپنی آمدورفت کی وجہ سے ایسی دستاویز فراہم نہیں کر پاتے۔ آر جے ڈی کے منوج جھا کا کہنا ہے کہ یہ منظم طریقہ سے ووٹروں کو ووٹر لسٹ سے خارج کرنے کی کوشش ہے اور 20 فیصد تک مہاجر ووٹر اس عمل سے متاثر ہو سکتے ہیں۔

کانگریس لیڈر راہل گاندھی آج پٹنہ کے لیے روانہ ہو گئے ہیں جہاں وہ بہار بند اور چکہ جام کی حمایت میں ہونے والے مارچ میں شریک ہوں گے۔ راہل گاندھی دہلی ایئرپورٹ سے پرواز کے ذریعے روانہ ہوئے اور ان کی آمد کے بعد وہ براہ راست آر جے ڈی لیڈر تیجسوی یادو کے ساتھ انکم ٹیکس گولمبر سے الیکشن کمیشن کے دفتر تک پیدل مارچ کریں گے۔ راہل گاندھی ممکنہ طور پر حالیہ قتل کیس کے متاثرہ گوپال کھیمکا کے خاندان سے بھی ملاقات کر سکتے ہیں۔

پٹنہ کو حاجی پور، دربھنگہ، مظفرپور اور پورنیہ جیسے اضلاع سے جوڑنے والے مشہور گاندھی پل پر آج آر جے ڈی کارکنوں نے دھرنا دے کر پل کو مکمل طور پر بند کر دیا۔ یہ پل قومی شاہراہ 19 کا حصہ ہے اور ہزاروں لوگوں کے لیے روزمرہ آمدورفت کا اہم ذریعہ ہے۔ پل پر رکاوٹ کی وجہ سے گاڑیوں کی لمبی قطاریں لگ گئی ہیں۔

پٹنہ کے منیر حلقے میں واقع قومی شاہراہ 30 پر علی الصبح آر جے ڈی کارکنوں نے بہار بند کی حمایت میں احتجاج کیا۔ انہوں نے سڑک کے بیچوں بیچ ٹائر جلا کر سڑک کو مکمل طور پر بلاک کر دیا، جس سے ٹریفک کی روانی ٹھپ ہو گئی۔ پولیس موقع پر پہنچی مگر مظاہرین نے وہاں سے ہٹنے سے انکار کر دیا۔ احتجاجی مظاہرین حکومت مخالف نعروں کے ساتھ ساتھ یہ بھی کہہ رہے تھے کہ ایس آئی آر مہم اقلیتوں اور پسماندہ طبقات کو نشانہ بنانے کی کوشش ہے۔

جہان آباد کے کورٹ اسٹیشن پر مہاگٹھ بندھن کے حامیوں نے پٹنہ-گیا ریل سروس کو روک دیا۔ احتجاجیوں نے ریلوے ٹریک پر دھرنا دیا اور گاڑی کے آگے کھڑے ہو کر اس کی روانگی کو روک دیا۔ ان کا الزام تھا کہ ایس آئی آر مہم کے تحت مخصوص علاقوں کو نشانہ بنایا جا رہا ہے اور جان بوجھ کر مہاگٹھ بندھن کے ووٹ بینک کو کمزور کیا جا رہا ہے۔

بہار کے نائب وزیر اعلیٰ وجے سنہا نے مہاگٹھ بندھن کے چکّا جام پر سخت ردعمل دیتے ہوئے کہا ہے کہ ’’یہ احتجاج غیر ضروری اور عوام کو گمراہ کرنے والا ہے۔‘‘ ان کے مطابق انتخابی فہرست میں بہتری کے لیے الیکشن کمیشن کی ایس آئی آر مہم ہر ووٹر کے حق کی حفاظت کے لیے ہے، نہ کہ کسی مخصوص ذات یا پارٹی کے خلاف۔ انہوں نے سوال کیا کہ اگر الیکشن کمیشن فرضی ووٹروں کو روکنے کی کوشش کر رہا ہے تو حزبِ اختلاف کو اس پر اعتراض کیوں ہے؟