حج 2025: ’سعودی عرب سے بات کریں‘، حج کوٹہ میں 80 فیصد کی تخفیف پر محبوبہ مفتی اور عمر عبداللہ کی حکومت سے اپیل

ہر سال ہندوستان سے مسلمانوں کی ایک بڑی تعداد حج کے لیے سعودی عرب جاتی ہے۔ لیکن گزشتہ سال حج کے دوران ہجوم اور ہیٹ ویو کی وجہ سے حجاج کرام کی ایک بڑی تعداد کی موت ہو گئی تھی۔ رواں سال اس طرح کی پریشانی سے بچنے کے لیے سعودی حکومت نے ہجوم کو کنٹرول کرنے کے مقصد سے ہندوستان کے پرائیویٹ حج کوٹہ میں 80 فیصد تخفیف کر دی ہے۔ بڑے پیمانے پر حج کوٹے کی تخفیف پر پیپلز ڈیموکریٹک پارٹی کی سربراہ محبوبہ مفتی اور جموں و کشمیر کے وزیر اعلیٰ عمر عبداللہ نے وزیر خارجہ ڈاکٹر ایس جے شنکر سے فوری طور پر سعودی عرب کی حکومت سے بات کرنے کی اپیل کی ہے۔

اس حوالے سے محبوبہ مفتی نے کہا کہ سعودی حکومت کی طرف سے 80 فیصد تخفیف کے اچانک فیصلے نے ٹور آپریٹرز کو پریشان کر دیا ہے۔ انہوں نے وزیر خارجہ ایس جے شنکر سے گزارش کی ہے کہ اس مسئلہ کو فوری طور پر سعودی حکومت کے سامنے اٹھایا جائے اور اس کا کوئی حل نکالا جائے ورنہ ہزاروں لوگوں کو اس کا خمیازہ بھگتنا پڑے گا۔

محبوبہ مفتی کے علاوہ جموں و کشمیر کے وزیر اعلیٰ عمر عبداللہ نے وزیر خارجہ ایس جے شنکر سے اس کا حل تلاش کرنے کے لیے کہا ہے تاکہ متاثرہ حجاج کرام  کے مسائل کو حل کیا جاسکے۔ انہوں نے کہا کہ حیرانی کی بات ہے کہ 52 ہزار ہندوستانیوں کے حج سلاٹ منسوخ کر دیے گئے، حالانکہ وہ رقوم کی ادائیگی کر چکے تھے، یہ انتہائی افسوسناک ہے۔ عمر عبداللہ نے مزید کہا کہ یہ لوگ اس سال حج پر جانے کی امید کر رہے تھے لیکن سعودی عرب کی حکومت نے یہ اچانک فیصلہ کر کے انہیں حیران کر دیا ہے۔ اب ہندوستانی حکومت کو اس مسئلہ کا کوئی مناسب حل نکالنے کی فوری کوشش کرنی چاہیے تاکہ ہزاروں حجاج کرام کی مشکلات دور ہو سکیں۔

’دی ٹائمز آف انڈیا‘ کی ایک رپورٹ کے مطابق سعودی عرب نے پرائیویٹ ٹور آپریٹرز کے لیے منیٰ زون منسوخ کر دیا ہے، حالانکہ یہ پہلے انہیں الاٹ کیا گیا تھا۔ منیٰ مکہ کے قریب ایک ٹینٹ سٹی ہے جہاں حجاج کرام حج کے دوران 4 دن قیام کرتے ہیں۔ سعودی حکومت نے منیٰ کے زون 1 اور 2 کو پرائیویٹ ٹور آپریٹرز کے لیے بند کر دیا ہے جبکہ زون 3، 4 اور 5 کے لیے بھی ادائیگیاں روک دی گئی ہیں۔ واضح ہو کہ پہلے یہ زون ہندوستان کے 26 پرائیویٹ ٹور آپریٹرز کو الاٹ کیے گئے تھے جن کے تحت 52 ہزار حجاج کرام کو یہاں آنا تھا۔