گوتم گمبھیر کی والدہ کو پڑا دل کا دورہ، انگلینڈ دورہ درمیان میں چھوڑ کر ہندوستان آئے واپس

ہندوستانی کرکٹ ٹیم کے ہیڈ کوچ گوتم گمبھیر انگلینڈ دورہ درمیان میں ہی چھوڑ کر ہندوستان واپس آ چکے ہیں۔ اس کے پیچھے کی وجہ ان کی ماں کی ناساز طبیعت بتائی جا رہی ہے۔ میڈیا رپورٹس میں بتایا جا رہا ہے کہ گوتم گمبھیر کی ماں کو دل کا دورہ پڑا ہے، جس کے بعد انھیں اسپتال میں داخل کرایا گیا ہے۔ موصولہ اطلاع کے مطابق اس وقت وہ آئی سی یو میں ہیں، جہاں ڈاکٹر ان کی صحت پر لگاتار نظریں رکھے ہوئے ہیں۔

بتایا جاتا ہے کہ گوتم گمبھیر کی ماں کو دل کا دورہ 11 جون کو پڑا تھا۔ اس کی خبر جیسے ہی گمبھیر کو ملی، وہ انگلینڈ سے ہندوستان لوٹ آئے۔ امید ظاہر کی جا رہی ہے کہ سب کچھ بہتر رہا تو وہ 17 جون تک دوبارہ ہندوستانی ٹیم سے جڑ جائیں گے۔ حالانکہ اس تعلق سے فی الحال کچھ بھی مصدقہ طور پر کہنا ممکن نہیں ہے۔

قابل ذکر ہے کہ ہندوستانی ٹیم کو 13 جون سے 16 جون تک انٹرا اسکواڈ میچ کھیلنا تھا، جس میں بہترین ہندوستانی لائن اَپ کو تلاش کرنے کا کام ہیڈ کوچ ہونے کے ناطے گوتم گمبھیر کو کرنا تھا۔ لیکن اب ان کی غیر موجودگی میں یہ کام باقی کے سپورٹ اسٹاف کو کرنا پڑے گا۔ ویسے ہندوستان اور انگلینڈ کے درمیان 5 ٹیسٹ میچوں کی سیریز کا پہلا میچ 20 جون سے ہیڈنگلے میں کھیلا جائے گا۔ امید یہی ہے کہ گوتم گمبھیر کی فیملی پر آئی پریشانی جلد ختم ہو جائے گی، اور وہ 20 جون سے قبل ہندوستانی ٹیم کے ساتھ جڑ جائیں گے۔