سری نگر میں پٹاخے پھوڑنے پر مکمل پابندی عائد

سری نگر: جموں وکشمیر کے گرمائی دارالحکومت سری نگر کے ضلع ترقیاتی کمشنر سید عابد رشید شاہ نے ایک حکم نامہ جاری کیا ہے جس میں ضلع کی حدود میں پٹاخوں کی خریدوفروخت اورپٹاخے پھوڑنے پر مکمل پابندی عائد کرنے کی بات کہی گئی ہے۔ اس فیصلہ کے بعد علاقے میں پٹاخہ فروخت کرنے والوں کے لیے پریشانیاں بڑھ گئی ہیں۔ اگر انھیں پٹاخہ فروخت کرتے ہوئے یا کسی کو پٹاخہ پھوڑتے ہوئے دیکھا جائے گا تو انھیں سزا بھی ہو سکتی ہے۔

سرکاری ترجمان کے مطابق یہ حکم نامہ عوامی جان ومال کے تحفظ کو یقینی بنانے کے لئے جاری کیا گیا ہے۔حکم نامے میں مزید کہا گیا ہے کہ پٹاخوں کی خرید و فروخت اورپٹاخے پھوڑنے میں ملوث افراد کے خلاف سخت قانونی کارروائی کی جائے گی۔ سری نگر کے ایس ایس پی کو اس حکم نامے پر من وعن عمل در آمد یقینی بنانے کی ہدایت بھی دے دی گئی ہے۔

(یو این آئی اِن پُٹ کے ساتھ)