کسان تحریک اس وقت اپنے شباب پر ہے اور کسان لیڈر راکیش ٹکیت اب اسے پورے ملک میں پھیلانے کے لیے سرگرم نظر آ رہے ہیں۔ انھوں نے ہریانہ کے ہسار میں ایک تقریب سے خطاب کرتے ہوئے کہا ہے کہ ’’اگلا ہدف 40 لاکھ ٹریکٹرس کا ہے۔ ملک بھر میں جا کر 40 لاکھ ٹریکٹرس اکٹھا کریں گے۔ زیادہ مسئلہ پیدا کیا گیا تو یہ ٹریکٹر بھی وہی ہیں، یہ کسان بھی وہی ہیں، یہ پھر دہلی جائیں گے۔ اس بار ’ہل کرانتی‘ ہوگی، جو کھیت میں اوزار استعمال ہوتے ہیں، وہ سب پہنچیں گے۔‘‘
Published: 18 Feb 2021, 8:11 AM IST
مرکزی وزیر داخلہ امت شاہ نے آج ایک بار پھر اس بات کو دہرایا کہ تینوں نئے زرعی قوانین میں کہیں بھی ایم ایس پی ختم کرنے کا کوئی تذکرہ نہیں ہے۔ انھوں نے کہا کہ کسانوں میں یہ غلط فہمی پھیلائی جا رہی ہے جو مناسب نہیں ہے۔ سچ یہ ہے کہ ایم ایس پی جیسے پہلے تھا، ویسے ہی جاری رہے گا۔
Published: 18 Feb 2021, 8:11 AM IST
متھرا: راشٹریہ لوک دل کے نائب صدر جینت چودھری نے جمعرات کو کہا کہ کسان اپنی زمین کی تحفظ کی لڑائی لڑرہا ہے۔ چودھری نے مورگرا میں منعقد کسان پنچایت سے خطاب کرتے ہوئے کہا کہ ملک میں کسان خالصتانی، شرپسند کہہ کر رسواکیا جارہا ہے۔ ایسا آزاد ہندوستان کی تاریخ میں پہلے کبھی نہیں ہوا۔ چودھری چرن سنگھ غریب،گاوں اور کسان کی بات کرتے تھے اور ان کے لئے خلوص دل سے کام بھی کرتے تھے انہوں نے نعرہ دیا تھا کہ ملک کی خوشحال کا راستہ گاوں کے کھیت اورکھلہانوں سے ہوکر گذرتا ہے۔ انہوں نے کہا کہ انگریزوں کی پھوٹ ڈالو راج کرو کی پالیسی پر آج مودی حکومت کام کررہی ہے۔ پہلے کہا کہ یہ کسانوں کی تحریک نہیں خالصتانیوں کی تحریک ہے۔ اب کہہ رہے کہ یہ تو صرف جاٹوں کا معاملہ ہے جاٹوں کو ٹھیک کرنا ہے ہم کہہ رہے ہیں یہ کسان کی بات ہے اور وہ اس میں ایک ذات کو لے کر آرہے ہیں۔
Published: 18 Feb 2021, 8:11 AM IST
راکیش ٹکیت نے مرکز کی مودی حکومت کو تنقید کا نشانہ بناتے ہوئے آج میڈیا سے کہا کہ ’’ان کو لگتا ہے کہ فصل کٹائی کا وقت آ گیا تو یہ ایک مہینے میں چلے جائیں گے۔ راجستھان اور پنجاب میں فصل کٹائی میں ایک مہینے کا فرق ہے۔ راجستھان کے کسان آئیں گے اور پنجاب والے کسان اپنی فصل کاٹنے چلے جائیں گے۔‘‘
Published: 18 Feb 2021, 8:11 AM IST
کسانوں کے ذریعہ آج چار گھنٹے کی ’ریل روکو‘ مہم 12 بجے سے 4 بجے تک چلی۔ اس دوران کسی ناخوشگوار واقعہ کی اطلاع کہیں سے موصول نہیں ہوئی ہے۔ انتہائی پرامن طریقے سے کسانوں کی یہ مہم اختتام کو پہنچی۔ اس درمیان ریلوے ذرائع کا کہنا ہے کہ ملک کے سبھی زون میں ٹرین کی آمد و رفت معمول پر رہی۔ بیشتر ریلوے زون نے مظاہرین کے ذریعہ کسی بھی ٹرین کو روکنے کے واقعہ کی خبر نہیں دی ہے۔
Published: 18 Feb 2021, 8:11 AM IST
کانگریس جنرل سکریٹری پرینکا گاندھی کا کل ہونے والا متھرا دورہ رد ہو گیا ہے۔ جمعہ کو متھرا کے سونکھ روڈ پالی کھیڑا میں کسان پنچایت ہونے والی تھی لیکن سابق مرکزی وزیر اور سینئر کانگریس لیڈر کیپٹن ستیش شرما کے انتقال کے سبب اب یہ کسان پنچایت 23 فروری تک کے لیے ملتوی کی گئی ہے۔ پارٹی کے ریاستی سکریٹری اور متھرا انچارج امت شاہ نے اس سلسلے میں جانکاری دی اور کہا کہ اب کسان پنچایت 23 فروری کو منعقد ہوگی۔
Published: 18 Feb 2021, 8:11 AM IST
راکیش ٹکیت نے کہا، ’’فصلوں کی قیمت نہیں بڑھائی جا رہے لیکن ایندھن کی قیمتیں بڑھ رہی ہیں۔ اگر مرکز کی طرف سے صورت حال بگاڑی جائے گی تو ہم اپنے ٹریکٹر لے کر بنگال تک جائیں گے، وہاں بھی کسانوں کو ایم ایس پی نہیں مل رہی ہے۔‘‘
Published: 18 Feb 2021, 8:11 AM IST
مرکز کے تینوں زرعی قوانین کے خلاف مختلف کسان تنظیموں کی آج 'ریل روکو' تحریک کی وجہ سے ریلوے کو بہت سی ٹرینوں کو منسوخ کرنا پڑا اور لدھیانہ اور فیروز پور سے آنے والی ٹرینوں میں سے کوئی بھی گاڑی موگا نہیں آسکی۔
ضلع موگا میں، بی کی یو ایکتا اُگراہا سمیت مختلف کسان تنظیموں سے وابستہ کسانوں نے اجیتوال پر پٹریوں پر دھرنا دیا۔ بی کے یو ایکتا اُگراہا کے جنرل سکریٹری سکھدیو سنگھ کوکری یہاں موجود تھے۔
Published: 18 Feb 2021, 8:11 AM IST
کسانوں کی ملک گری ریل روکو مہم جاری ہے اور اویشہ کے پوری سے اتراکھنڈ کے ہریدوار کے لیے راونہ ہونے والی اتکل ایکسپریس کو غازی آباد اسٹیشن پر روک دیا گیا ہے۔ دراصل کسان آگے مودی نگر ریلوے پر مظاہرہ کر رہے ہیں اور ریلوے ٹریک پر قبضہ جما لیا ہے، اس لیے اتکل ایکسپریس کو آگے جانے کی اجازت نہیں دی گئی ہے۔
Published: 18 Feb 2021, 8:11 AM IST
ملک گیر ریل روکو مہم کے تحت جموں میں یونائیٹڈ کسان فرنٹ کی طرف سے احتجاج کیا گیا۔ مظاہرین نے جموں کے چنی ہمت علاقہ میں ریل کی پٹری پر اتر کر مظاہرہ کیا اور کسانوں کے حق میں نعرے بلند کیے۔
Published: 18 Feb 2021, 8:11 AM IST
کسانوں نے دوپہر 12 بجے ملک گیر ریل روکو مہم کا آغاز کر دیا۔ اس مہم کے تحت شام کے 4 بجے تک ملک بھر میں ریلوں کا چکہ جام کیا جائے گا۔
Published: 18 Feb 2021, 8:11 AM IST
پٹنہ جنکشن پر کسانوں کی ریل روکو مہم کے 12 بجے شروع ہونے سے قبل ہی جن ادھیکار پارٹی (لوکتانترک) نے ٹرین روک کر احتجاج کیا۔
Published: 18 Feb 2021, 8:11 AM IST
ریل روکو مہم کے پیش نظر دہلی میٹرو کے کئی اسٹیشنوں پر داخلی اور خارجی دروازوں کو بند رکھا گیا ہے۔ ٹیکری بارڈر، پنڈت شری رام شرما، بہادر گڑھ سٹی اور بریگیڈیر ہوشیار سنگھ اسٹیشن پر انٹری اور ایگزٹ گیٹ بند رکھ گیے ہیں۔
Published: 18 Feb 2021, 8:11 AM IST
کسانوں کی 4 گھنٹہ کی ریل روکو مہم کے پیش نظر ہریانہ کے پلول میں ریلوے اسٹیشن کے باہر بڑی تعداد میں پولیس اہلکاروں کو تعینات کیا گیا ہے۔
Published: 18 Feb 2021, 8:11 AM IST
بھارتیہ کسان یونین کے ترجمان راکیش ٹکیت نے ریل روکو تحریک پر بات کرتے ہویے کہا، ’’یہ دوپہر 12 بجے سے شروع ہوگی اور 3-4 بجے تک چلے گی۔ ٹرین کہیں بھی نہیں چلے گی۔ مہم پُر امن رہے گی۔ ہم ان لوگوں کو پانی، دودھ اور لسی پیش کریں گے جو درماندہ پایے جائیں گے۔ ہم ان کو اپنے مسائل بتائیں گے۔‘‘
Published: 18 Feb 2021, 8:11 AM IST
نئے زرعی قوانین کے خلاف کسانوں کا 29 نومبر سے ملک گیر احتجاج جاری ہے اور بڑی تعداد میں کسان دہلی کی سرحدوں پر بیٹھے ہوئے ہیں۔ آج یعنی 18 فروری کو اسی احتجاج کے تحت ملک گیر ریل روکو مہم چلائی جا رہی ہے۔ ریل روکو مہم کے تحت دوپہر 12 بجے سے شام 4 بجے تک چکہ جام کیا جائے گا۔
کسانوں کی ریل روکو مہم کے پیش نظر ریلوے نے سیکورٹی کے سخت انتظامات کیے ہیں تاکہ کسان مظاہرین کسی طرح کی رخنہ اندازی نہ کریں۔ ریلوے پروٹیکشن اسپیشل فورسز کی 20 اضافی کمپنیوں کی تعیناتی کی گئی ہے۔
کسانوں کا اعلان ہے کہ ’’نئے زرعی قوانین کے خلاف ملک بھر میں ٹرینوں کے پہیے روکے جائیں گے۔ دوپہر 12 بجے سے شام 4 بجے تک ملک بھر میں ’ریل روکو مہم‘ چلائی جائے گی۔‘‘ قابل غور بات یہ ہے کہ پچھلی بار جب کسان لیڈروں نے ملک گیر ’چکہ جام‘ کا اعلان کیا تھا تو کچھ ریاستوں مثلاً یوپی، اتراکھنڈ اور دہلی-این سی آر کو اس سے چھوٹ دی گئی تھی، لیکن ریل روکو مہم سے کسی بھی ریاست کو چھوٹ نہیں دی گئی ہے۔ یہی وجہ ہے کہ ریلوے نے حفاظتی انتظامات سخت کرتے ہوئے ریلوے پروٹیکشن اسپیشل فورسز کی 20 اضافی کمپنیوں کی تعیناتی کی ہے۔
Published: 18 Feb 2021, 8:11 AM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 18 Feb 2021, 8:11 AM IST