خاتون کے اپنے پھوپا سے ناجائز تعلقات تھے، شادی کے 45 دن بعد شوٹروں کی مدد سے شوہر کا قتل!

بہار کے اورنگ آباد ضلع سے ایک دل دہلا دینے والا معاملہ سامنے آیا ہے۔ بیوی نے اپنے عاشق اور حقیقی پھوپا کے ساتھ مل کر شوہر کو مبینہ قتل کرنے کی سازش کی اور قتل کو انجام دیا۔ یہ واقعہ 24 جون کی رات نبی نگر تھانہ علاقے میں لمبوکھاپ موڑ کے قریب پیش آیا، جب پریانشو عرف چھوٹو کو گولی مار کر ہلاک کر دیا گیا۔ پولیس نے ایک ہفتے کے اندر قتل کا یہ کیس حل کرلیا ہے۔

اورنگ آباد کے ایس پی امبریش راہل نے اس قتل کیس کا پردہ فاش کرتے ہوئے کہا کہ مقتول کی بیوی گونجا سنگھ کے اپنے حقیقی پھوپا جیون سنگھ کے ساتھ ناجائز تعلقات تھے۔ لیکن گونجا کی پریانشو سے شادی ہو گئی، جس کی وجہ سے ان کی محبت میں خلل پڑ گیا۔ اسی وجہ سے گونجا اور جیون نے مل کر پریانشو کو ختم کرنے کا منصوبہ بنایا۔

ایس پی کے مطابق جیون سنگھ نےپریانشو کو مارنے کے لیے شوٹروں کو پیسے دیے۔ 24 جون کی رات جب پریانشو موٹر سائیکل پر اپنے گاؤں بروان واپس آ رہا تھا، گھات لگا کر بیٹھے ہوئے حملہ آوروں نے اسے گولی مار کر ہلاک کر دیا۔

اس سنسنی خیز قتل کی تحقیقات کے لیے ایک خصوصی تحقیقاتی ٹیم (SIT) تشکیل دی گئی تھی۔ ٹیم نے تکنیکی تحقیقات کے تحت موبائل سی ڈی آر، سی سی ٹی وی فوٹیج اور خفیہ معلومات کی بنیاد پر گونجا سنگھ، جے شنکر اور مکیش شرما کو گرفتار کیا۔ پوچھ گچھ کے دوران گونجا نے اپنے جرم کا اعتراف کر لیا۔

ایس پی نے کہا کہ قتل کی اس سازش میں ملوث دیگر مجرموں کی بھی نشاندہی کر لی گئی ہے اور انہیں جلد گرفتار کر لیا جائے گا۔ انہوں نے یہ بھی کہا کہ اس معاملے میں پیشہ ورانہ انداز میں کارروائی کی جا رہی ہے تاکہ مجرموں کو سخت سے سخت سزا دی جا سکے۔ (بشکریہ نیوز پورٹل آج تک‘)