چیف جسٹس آف انڈیا گوئی کا جانشیں کون ہوگا؟ مرکزی حکومت نے شروع کیا اگلے سی جے آئی کی تقرری کا عمل

ہندوستان کے موجودہ چیف جسٹس آف انڈیا (سی جے آئی) بی آر گوئی کے بعد ملک کا اگلا چیف جسٹس کون ہوگا؟ اس کی کارروائی مرکزی حکومت نے شروع کر دی ہے۔ سی جے آئی گوئی آئندہ ماہ 23 نومبر کو ریٹائر ہو رہے ہیں۔ ان کی سبکدوشی سے قبل ملک کے نئے چیف جسٹس کی تقرری ہو جانی ہے۔ جسٹس سوریہ کانت اگلے سی جے آئی کی ریس میں ہیں اور ان کا چیف جسٹس آف انڈیا بننا تقریباً طے مانا جا رہا ہے۔

سپریم کورٹ اور ہائی کورٹ کے ججوں کی تقرری کے عمل سے واقف لوگوں نے نیوز ایجنسی ’پی ٹی آئی‘ کو بتایا کہ سی جے آئی گوئی کو ان کے جانشین کا نام بتانے والا لیٹر جمعرات کی شام یا جمعہ کو دیا جائے گا۔ میمورنڈم آف پروسیزر کے مطابق جو سپریم کورٹ اور ہائی کورٹ کے ججوں کی تقرری، ٹرانسفر اور ترقی کو گائیڈ کرنے والے ڈاکیومنٹس کا ایک سیٹ ہے، اس میں کہا گیا ہے کہ ہندوستان کے چیف جسٹس کے عہدہ پر تقرری سپریم کورٹ کے سب سے سینئر جج کی ہونی چاہیے، جنہیں عہدہ سنبھالنے کے لیے موزوں تصور کیا جائے۔

واضح رہے کہ مرکزی وزیر قانون مناسب وقت پر ہندوستان کے موجودہ چیف جسٹس سے اگلے سی جے آئی کی تقرری کے لیے سفارش طلب کریں گے۔ عام طور پر یہ لیٹر موجودہ سی جے آئی کے 65 سال کی عمر میں ریٹائر ہونے سے ایک ماہ پہلے بھیج جاتا ہے۔ جسٹس سوریہ کانت سی جے آئی گوئی کے بعد سب سے سینئر جج ہیں اور ان کے اگلے سی جے آئی بننے کا سب سے زیادہ امکان ہے۔