وشنو دیو سائے ہوں گے چھتیس گڑھ کے نئے وزیر اعلیٰ، بی جے پی نے قبائلی لیڈر کو دیا موقع

رائے پور: چھتیس گڑھ میں بی جے پی کے جیت درج کرنے کے بعد تمام طرح کی قیاس آرائیوں کے درمیان بی جے پی نے نئے وزیر اعلیٰ کے نام کا اعلان کر دیا ہے۔ قبائلی لیڈر وشنو دیو سائے چھتیس گڑھ کے نئے وزیر اعلیٰ ہوں گے۔ بی جے پی کی جیت کے بعد وزیر اعلیٰ عہدے کے جو دعویدار سامنے آ رہے تھے ان میں رمن سنگھ، ارون ساو، او پی چودھری اور رینوکا سنگھ کے نام شامل ہیں۔ تاہم، سابق مرکزی وزیر وشنو دیو سائے کے نام پر مہر ثبت کر دی گئی۔

ذرائع کے مطابق بی جے پی کی مرکزی قیادت نے وزیر اعلیٰ کے لیے قبائلی رہنما وشنو دیو ساو کا نام تجویز کیا، جسے رائے پور میں منعقدہ قانون ساز پارٹی کے اجلاس کے دوران منظور کر لیا گیا۔ سائے کے نام کے اعلان کے ساتھ ہی وزیر اعلیٰ کے نام کو لے کر ایک ہفتے سے جاری تمام قیاس آرائیوں کا خاتمہ ہو گیا۔

مرکزی مبصر سربانند سونووال، ارجن منڈا اور دشینت کمار گوتم کے علاوہ چھتیس گڑھ بی جے پی کے انچارج اوم ماتھر تقریباً 9 بجے قانون ساز پارٹی کی میٹنگ کے لیے رائے پور پہنچے تھے۔ خیال رہے کہ ریاست میں پہلے ہی اس طرح کی قیاس آرائیاں بھی کی جا رہی تھیں کہ بی جے پی اس مرتبہ کسی قبائلی رہنما کو ریاست کا وزیر اعلیٰ مقرر کرے گی۔

یاد رہے کہ حال ہی میں پانچ ریاستوں کے ہونے والے انتخابات کے دوران بی جے پی نے کسی بھی ریاست میں وزیراعلیٰ کے چہرے کا اعلان نہیں کیا تھا۔ 90 سیٹوں پر مشتمل چھتیس گڑھ اسمبلی سیٹوں میں سے بی جے پی نے 54 سیٹوں پر کامیابی حاصل کر کے مکمل اکثریت حاصل کر لی، جبکہ کانگریس صرف 34 سیٹیں جیت سکی۔