اتراکھنڈ ٹنل ریسکیو: کانگریس ایم ایل اے ریٹ ہول مائنرز جانبازوں کو ایک ماہ کی تنخواہ دے کر نوازیں گے

نینی تال: اتراکھنڈ کانگریس پارٹی کے تمام ایم ایل اے سلکیارا ٹنل میں پھنسے 41 مزدوروں کو باہر نکالنے میں اپنا اہم رول ادا کرنے والے ’ریٹ ہول مائنرز‘ کے بہادر جوانوں کو ایک ماہ کی تنخواہ دے کر نوازیں گے۔

اتراکھنڈ اسمبلی میں اپوزیشن لیڈر یشپال آریہ نے جمعرات کو ایک بیان جاری کرتے ہوئے یہ بات کہی۔ تاہم انہوں نے یہ نہیں بتایا کہ وہ ان بہادروں کو کب اور کہاں اعزاز سے نوازیں گے۔

انہوں نے جاری بیان میں کہا کہ ریاستی حکومت کی طرف سے ریٹ ہول مائنر دیا جانے والا ایک لاکھ روپے کا انعام بہت کم ہے۔ ان کا مزید کہنا تھا کہ جب حکومت کے تمام منصوبے ناکام ہوئے تو ریٹ ہول مائنر کے بہادر جوانوں کی بدولت سرنگ میں پھنسے مزدوروں کو نکالنے میں کامیابی ملی۔

انہوں نے یہ بھی کہا کہ کانگریس پارٹی کے تمام ایم ایل ایز کی جانب سے ان ریٹ ہول مائنرز کے بہادروں کو انعام کے طور پر ایک ماہ کی تنخواہ دے کر ان کی عزت افزائی کی جائے گی۔ ان جوانوں نے اپنی جان خطرے میں ڈال کر اس آپریشن کو کامیاب بنایا ہے۔