اتراکھنڈ: گولی باری میں بی جے پی لیڈر کی بیوی ہلاک، اشتہاری مجرم پکڑنے گئی یوپی پولیس پر قتل کا مقدمہ درج

دہرادون: اتراکھنڈ میں یوپی پولیس کے خلاف قتل کا مقدمہ درج کیا گیا ہے۔ یوپی پولیس پر بی جے پی لیڈر کی بیوی کو قتل کرنے کا الزام ہے۔ این ڈی ٹی وی کی رپورٹ کے مطابق، مرادآباد پولیس بدھ کی دیر رات اتراکھنڈ کے جسپور میں ایک اشتہاری مجرم کو گرفتار کرنے کے لئے گئی تھی۔

اس دوران گاؤں والوں نے پولیس کو گھیر لیا تو دونوں طرف سے فائرنگ شروع ہو گئی۔ فائرنگ میں جسپور کے بی جے پی لیڈر گرتاج سنگھ کی بیوی ہلاک ہو گئی۔ الزام ہے کہ خاتون کی موت پولیس کی فائرنگ سے ہوئی ہے۔ مرادآباد پولیس کے 2 اہلکاروں کو بھی گولیاں لگی ہیں۔ پولیس ٹیم کے کئی لوگوں کو یرغمال بنانے کی بھی اطلاع ہے۔

خیال رہے کہ مرادآباد پولیس ظفر کو پکڑنے گئی تھی، جس پر 50 ہزار کا انعام تھا۔ مرادآباد پولیس کو اطلاع موصول ہوئی تھی کہ ظفر بلاک سربراہ گرتاج کے گھر چھپا ہوا ہے۔ مرادآباد پولیس کے پہنچنے پر دونوں طرف سے فائرنگ ہوئی جس میں بلاک سربراہ کی بیوی گرپریت کور کی موت ہو گئی۔ کچھ پولیس اہلکاروں کے لاپتہ ہونے کی بھی اطلاعات ہیں۔