معذور نے کہا اکھلیش کو دونگا ووٹ، بی جے پی رہنما نے کہا ’منہ میں گھسا دونگا لٹھ‘

اتر پردیش کے سنبھل ضلع میں ایک بی جے پی رہنما کی طرف سے معذور شخص کے ساتھ بدسلوکی کیے جانے کی ویڈیو منظر عام پر آئی ہے۔ ویڈیو میں بی جے پی رہنما معذور شخص کے منہ میں ڈنڈا گھسا دینے کی بات کرتا ہوا نظر آرہا ہے۔ بتایا جا رہا ہے کہ معذور شخص نے اگلی بار اکھلیش یادو کو ووٹ دینے کی بات کہی تھی۔ میڈیا رپورٹوں کے مطابق اس بات پر بی جے پی رہنما کو اس قدر غصہ آیا کہ اس نے جو ڈنڈا ہاتھ میں لیا ہوا تھا اسے معذور کے منہ میں گھسانے کی دھمکی دینے لگا۔ یہ واقعہ ایس ڈی ایم دفتر کے باہر کا ہے۔

سوشل میڈیا پر اس ویڈیو کے وائرل ہو جانے کے بعد سنسنی پھیل گئی۔ پولس نے بھی ویڈیو کی بنا پر ایس سی/ ایس ٹی ایکٹ کے تحت معاملہ درج کر لیا ہے، پولس معاملہ کی جانچ کر رہی ہے۔ وہیں بی جے پی کی طرف سے اعتراف کیا گیا ہے کہ ویڈیو میں نظر آنے والا شخص ان کی پارٹی سے جڑا ہوا ہے۔ بی جے پی کا بیان ہے کہ اس رہنما کے خلاف کارروائی کی جائے گی۔

ویڈیو کے منظرعام پر آنے کے بعد ملزم بی جے پی رہنما محمد میاں کا بھی بیان سامنے آیا ہے۔ اپنے بیان میں بی جے پی رہنما نے اپنا بچاؤ کرتے ہوئے الٹے معذور شخص پر الزام عائد کیا ہے۔ بی جے پی رہنما نے کہا کہ معذور شخص وزیراعظم مودی اور وزیر اعلیٰ یوگی آدتیہ ناتھ کے خلاف نازیبا الفاظ کا استعمال کر رہا تھا۔

واضح رہے کہ یہ پہلی مرتبہ نہیں ہے جب اتر پردیش میں بی جے پی رہنماؤں کی غنڈہ گردی سامنے نظر آئی ہے۔ اس سے پہلے اکتوبر مہینے میں میرٹھ کے ایک ریسٹورینٹ میں بی جے پی کونسلر کی غنڈہ گردی کی ویڈیو وائرل ہوئی تھی۔ ریسٹورینٹ میں کھانا کھانے پہنچے داروغہ کے ساتھ بی جے پی کونسلر نے بدسلوکی کی تھی۔ داروغہ کے ساتھ موجود ایک خاتون وکیل کو بھی بی جے پی رہنما نے نہیں بخشا تھا۔