اتر پردیش: وزراء، اراکین پارلیمنٹ اور اراکین اسمبلی کے احترام میں کمی کرنے والے افسران کو ملے گی سزا، نوٹیفکیشن جاری

اتر پردیش میں اب ایڈمنسٹریٹو افسران کو اراکین پارلیمنٹ و اراکین اسمبلی کو خصوصی احترام دینا لازم ہوگا۔ اگر کوئی رکن پارلیمنٹ یا رکن اسمبلی ان سے ملنے دفتر پہنچتا ہے تو افسران کو اپنی نشست سے اٹھ کر ان کا خیر مقدم اور استقبال کرنا ہوگا۔ اگر افسران احترام والا برتاؤ نہیں کرتے ہیں تو ان کے خلاف کارروائی کی جا سکتی ہے۔

اتر پردیش کے چیف سکریٹری ایس پی گوئل نے اس سلسلے میں سرکاری حکم نامہ جاری کر دیا ہے۔ جاری نوٹیفکیشن میں واضح ہدایات دی گئی ہیں کہ ریاست کے تمام افسران کو وزراء، اراکین پارلیمنٹ اور اراکین اسمبلی کے ساتھ شائستگی اور پروٹوکول کا مکمل خیال رکھنا ہوگا۔ اس کے تحت اگر کوئی رکن پارلیمنٹ و رکن اسمبلی کسی افسر کے دفتر پہنچتا ہے تو افسر اپنی نشست سے اٹھ کر ان کا استقبال کریں گے۔

نوٹیفکیشن کے مطابق افسران کے پاس اگر اراکین پارلیمنٹ یا اراکین اسمبلی کی فون کال آتی ہے تو اس کا جواب دینا لازمی ہوگا۔ اگر کسی وجہ سے افسر مصروف ہوں تو انہیں بعد میں کال بیک کر کے جواب دینا ضروری ہوگا۔ ساتھ ہی رکن اسمبلی یا رکن پارلیمنٹ کے ذریعہ کوئی شکایت کی جاتی ہے تو ان معاملات کا ممکنہ حد تک معیاری طریقے سے ازالہ کرتے ہوئے اس کی اطلاع بھی دینی ہوگی۔

حکم نامہ میں صاف لفظوں میں کہا گیا ہے کہ اگر احترام کے ساتھ برتاؤ نہیں کیا جاتا تو حکومت کی جانب سے اتر پردیش ریاستی ملازمین کے ضابطۂ اخلاق کے تحت سخت کارروائی کی جائے گی۔ افسران کے لیے ان تمام احکامات پر سختی سے عمل کرنا لازمی ہوگا۔ ساتھ ہی چیف سکریٹری نے پہلے جاری کیے گئے 15 احکامات کی فہرست جاری کرتے ہوئے بتایا کہ اب تک حکومت کی جانب سے جاری رہنما خطوط پر صحیح طریقے سے عمل نہیں ہو رہا تھا۔ اکثر افسران کی جانب سے اراکین اسمبلی اور اراکین پارلیمنٹ کے فون نہ اٹھانے کی شکایات موصول ہو رہی تھیں۔ یہ معاملہ ایوان میں بھی اٹھایا گیا تھا، جس سے واضح ہے کہ حکومتی احکامات پر عمل نہیں کیا جا رہا تھا۔ انہوں نے کہا کہ یہ صورت حال انتہائی افسوسناک ہے۔