اتر پردیش میں برڈ فلو کی زد میں تین چڑیا گھر اور اٹاوہ میں شیر سفاری سات دن کے لیے بند

اتر پردیش میں برڈ فلو کے معاملات کو لے کر چوکسی بڑھا دی گئی ہے۔ گورکھپور کے شہید اشفاق اللہ خان زولوجیکل پارک میں شیرنی کی موت کے بعد اس میں برڈ فلو کی تصدیق ہوئی ہے۔ اس کے بعد وزیر اعلی یوگی آدتیہ ناتھ کی ہدایت پر ریاستی حکومت نے بڑا قدم اٹھایا ہے۔

موصولہ اطلاعات کے مطابق، احتیاطی اقدام کے طور پر اٹاوہ شیر سفاری کے ساتھ لکھنؤ، کانپور اور گورکھپور کے چڑیا گھر کو اگلے سات دنوں کے لیے بند کر دیا گیا ہے۔ وزیر اعلیٰ کی ہدایات کے بعد منگل کو پرنسپل چیف کنزرویٹر آف فاریسٹ (وائلڈ لائف) انورادھا ویموری نے اس سلسلے میں احکامات جاری کئے۔

اس دوران تمام چڑیا گھروں میں جانوروں کی کڑی نگرانی کی جائے گی۔ اگر کسی جانور میں برڈ فلو سے متعلق علامات پائی جائیں تو اسے فوری طور پر مناسب طبی سہولت فراہم کی جائے گی۔ اس کے ساتھ ساتھ چڑیا گھر کے آس پاس کسی بھی پرندے یا جانور کی غیر معمولی موت کو سنجیدگی سے لیا جائے گا اور اس کی تحقیقات کی جائے گی۔

محکمہ جنگلات نے عوام سے اپیل کی ہے کہ وہ آئندہ چند روز تک چڑیا گھر جانے سے گریز کریں اور پرندوں یا جانوروں کی کسی بھی مشکوک موت کی اطلاع فوری طور پر انتظامیہ کو دیں۔ حکام کا کہنا ہے کہ یہ فیصلہ خالصتاً احتیاطی تدابیر کے طور پر کیا گیا ہے تاکہ وائرس کے پھیلاؤ کو روکا جا سکے۔

برڈ فلو کی صورتحال پر مسلسل نظر رکھی جارہی ہے اور اگر صورتحال معمول پر رہی تو بند  چڑیا گھر وں کو دوبارہ کھولنے کا فیصلہ کیا جائے گا۔ اس وقت تمام چڑیا گھروں میں صفائی ستھرائی پر بھی خصوصی زور دیا جا رہا ہے۔ ریاستی حکومت اس پورے معاملے پر گہری نظر رکھے ہوئے ہے اور کسی بھی ہنگامی صورتحال سے نمٹنے کے لیے تیار ہے۔