مغربی بنگال میں ’ایس آئی آر‘ پر ہنگامہ جاری، الیکشن کمیشن سے ناراض 50 بی ایل او نے دیا استعفیٰ

مغربی بنگال میں ’ایس آئی آر‘ کا معاملہ مستقل سرخیوں میں ہے۔ کئی علاقوں میں نہ صرف ووٹرس پریشان ہیں، بلکہ بی ایل او بھی مختلف مسائل کا سامنا کر رہے ہیں۔ مرشد آباد ضلع کے فرخہ بلاک میں تو حالات لگاتار کشیدہ ہوتے جا رہے ہیں۔ ایس آئی آر کے نام پر عام لوگوں کو پریشان کیے جانے کا الزام عائد کرتے ہوئے فرخہ بلاک کے سبھی بوتھ لیول افسران (بی ایل او) نے ایک ساتھ اجتماعی استعفیٰ دے دیا۔ یہ استعفیٰ بدھ کی صبح فرخہ بلاک الیکشن افسر یعنی ای آر او کے حوالے کر دیا گیا۔

میڈیا رپورٹس کے مطابق تقریباً 50 بی ایل او نے اپنے عہدہ سے استعفیٰ دیا ہے۔ بی ایل او کا الزام ہے کہ الیکشن کمیشن کی طرف سے بغیر کسی واضح گائیڈلائن کے بار بار واٹس ایپ کے ذریعہ الگ الگ طرح کی ہدایات بھیجی جا رہی ہیں۔ پہلے کہا گیا تھا کہ صرف فارم بھرنے سے ایس آئی آر کا عمل مکمل ہو جائے گا، لیکن بعد میں سماعت کے نام پر عام لوگوں کو بار بار فون کر بلایا جانے لگا۔

بتایا جا رہا ہے کہ ایس آئی آر کے بعد ہوئی سماعت کے دوران فرخہ بی ڈی او دفتر میں توڑ پھوڑ کا واقعہ سامنے آیا ہے۔ اس میں تقریباً 30 بی ایل او کے ایک نمائندہ وفد نے ایس آئی آر کے عمل میں موجود خامیوں پر اپنے اعتراضات ظاہر کیے۔ یہ نمائندہ وفد فرخہ کے ترنمول کانگریس رکن اسمبلی منیر الاسلام کی قیادت میں پہنچا تھا۔ اسی دوران ماحول خراب ہو گیا اور توڑ پھوڑ شروع ہو گئی۔ ایک میڈیا رپورٹ میں بتایا گیا ہے کہ کچھ ویڈیوز میں رکن اسمبلی کو یہ کہتے سنا گیا ہے کہ اگر کوئی اپنا نام ’رام‘ بتاتا ہے تو اس سے کوئی دستاویز نہیں مانگے جاتے، لیکن اگر کوئی اپنا نام ’رحیم‘ بتاتا ہے تو اسے پریشان کیا جا رہا ہے۔

بی ایل او کا دعویٰ ہے کہ ایس آئی آر کے موجودہ عمل سے کئی اہل ووٹرس کے نام ووٹر لسٹ سے کٹنے کا خطرہ ہے۔ جن لوگوں کے 6 بچے ہیں، ان سے بھی سوال پوچھے جا رہے ہیں، جبکہ آئین میں بچوں کی تعداد کو لے کر کوئی اصول نہیں ہے۔ بی ایل او نے کہا کہ وہ سبھی پیشے سے اسکول ٹیچر ہیں اور اسکول کی ذمہ داری کے ساتھ یہ اضافی اور الجھانے والا کام کرنا ان کے لیے ممکن نہیں ہے۔ بی ایل او کا یہ بھی کہنا ہے کہ عام لوگوں کے ساتھ ناانصافی اور اپنی پیشہ ورانہ ذمہ دار نبھانے میں نااہلی کے سبب انھیں عوامی طور پر استعفیٰ دینا پڑا۔ اس پورے واقعہ سے فرخہ بلاک کے سیاسی اور انتظامی حلقوں میں زبردست ہلچل مچ گئی ہے۔