اتر پردیش: 47 سالہ شادی شدہ بی جے پی لیڈر سماجوادی پارٹی لیڈر کی 26 سالہ بیٹی کے ساتھ فرار!

اتر پردیش کے ہردوئی ضلع میں بی جے پی لیڈر آشیش شکلا سماجوادی پارٹی کے ایک سینئر لیڈر کی بیٹی کو لے کر فرار ہو گئے ہیں۔ اس معاملے میں ایف آئی آر درج ہونے کے بعد تنازعہ بڑھنے پر بی جے پی نے آشیش کو پارٹی مخالف سرگرمیوں میں ملوث ہونے کا الزام لگا کر پارٹی سے نکال دیا ہے اور سبھی عہدوں سے بھی انھیں دستبردار کر دیا گیا ہے۔

موصولہ اطلاعات کے مطابق بی جے پی لیڈر آشیش شکلا 47 سال کے ہیں، جبکہ سماجوادی پارٹی کے ایک سینئر لیڈر کی بیٹی محض 26 سال کی ہے جس کے ساتھ آشیش فرار ہوئے ہیں۔ قابل ذکر بات یہ ہے کہ آشیش پہلے سے شادی شدہ ہیں اور انھیں 21 سال کا ایک بیٹا اور 7 سال کی ایک بیٹی بھی ہے۔ ذرائع کے مطابق جب لڑکی کے گھر والوں نے اس کی شادی طے کی تو دونوں بغیر کسی کو بتائے فرار ہو گئے۔

اس معاملے کے طول پکڑنے کے بعد اپنی بدنامی سے بچنے کے لیے بی جے پی نے آناً فاناً میں آشیش شکلا کے خلاف کارروائی کرتے ہوئے انھیں پارٹی سے معطل کر دیا۔ بی جے پی کے ہردوئی ضلع میڈیا انچارج گنگیش پاٹھک نے اس سلسلے میں صحافیوں کو بتایا کہ پارٹی کے شہر جنرل سکریٹری رہے آشیش شکلا کو معطل کر دیا گیا ہے اور انھیں سبھی عہدوں سے بھی ہٹا دیا گیا ہے۔

گنگیش پاٹھک کا کہنا ہے کہ پارٹی کی پالیسی کے خلاف کام کرنے اور اخلاق میں گراوٹ کے سبب ان سے سبھی عہدے چھین لیے گئے ہیں، اور ان کی بنیادی رکنیت بھی رد کر دی گئی ہے۔ آشیش شکلا کو اب پارٹی سے کوئی لینا دینا نہیں ہے۔ پولیس آشیش کے خلاف کارروائی کرنے کے لیے پوری طرح آزاد ہے۔ اس معاملے میں پولیس کی جانچ چل رہی ہے۔