یوپی: کانپور میں چند گھنٹوں کے اندر 2 حادثات میں 31 افراد ہلاک، 20 سے زائد زخمی

نئی دہلی: یوپی کے کانپور میں گزشتہ رات دو سڑک حادثات میں 31 لوگوں کی موت ہو گئی جبکہ 20 سے زیادہ لوگ زخمی بتائے جاتے ہیں۔ پہلے حادثے میں ہفتہ کو سادھ تھانہ علاقے کے بھدیونا گاؤں کے قریب مسافروں سے بھری ٹریکٹر ٹرالی کے تالاب میں گرنے سے کم از کم 26 لوگوں کی موت ہو گئی۔ دوسرے حادثے میں سڑک کے کنارے کھڑی گاڑی تیز رفتار ٹرک سے ٹکرا گئی، جس میں 5 کی جان گئی اور 10 افراد زخمی ہو گئے۔

پہلا حادثہ اس وقت پیش آیا جب عقیدت مندوں سے بھری ٹریکٹر ٹرالی تالاب میں گر گئی، اس حادثے میں 26 لوگوں کی موت ہو گئی۔ رپورٹ کے مطابق ٹرالی میں تقریباً 50 افراد سوار تھے اور مہلوکین میں بیشتر خواتین اور بچے شامل ہیں۔ موقع پر راحت اور بچاؤ کا کام کیا گیا اور حادثے میں زخمی ہونے والے افراد کو اسپتال میں داخل کرایا گیا ہے۔

ضلع مجسٹریٹ (ڈی ایم) وشاکھ جی آئیر نے کہا کہ ضلعی انتظامیہ کے حکام سے کہا گیا ہے کہ وہ ریسکیو آپریشن چلائیں اور متاثرین کی ہر ممکن مدد کو یقینی بنائیں۔ انہوں نے کہا، ’’حادثے کی وجہ جاننے کے لیے تحقیقات جاری ہے۔‘‘

اتر پردیش کے وزیر اعلی یوگی آدتیہ ناتھ سمیت پی ایم مودی اور صدر نے کانپور حادثے پر غم کا اظہار کیا ہے۔ وزیر اعلیٰ نے عہدیداروں کو راحت اور بچاؤ کا کام فوری طور پر انجام دینے کی ہدایت دی ہے اور لوگوں سے اپیل کی ہے کہ وہ ٹریکٹر ٹرالی کا استعمال صرف زرعی کاموں اور مال برداری کے لئے کریں۔

ایک عینی شاہد نے صحافیوں کو بتایا کہ وہ درجنوں دیگر افراد کے ساتھ جائے حادثہ پر پہنچا اور ان سب نے مردوں، عورتوں اور بچوں کے رونے کی آوازیں سنی۔ عینی شاہدین کے مطابق انہوں نے فوری طور پر پانی میں چھلانگ لگا دی اور کسی طرح انہیں باہر نکالنے میں کامیاب ہو گئے، تاہم ان میں سے کئی کو مردہ پایا۔

حادثے کا نوٹس لیتے ہوئے یوگی آدتیہ ناتھ نے حکام کو جنگی بنیادوں پر راحت اور بچاؤ کا کام کرنے کی ہدایت دی ہے۔ لکھنؤ میں جاری ایک سرکاری بیان کے مطابق یوگی آدتیہ ناتھ خود اس معاملے کی نگرانی کر رہے ہیں۔ انہوں نے مرنے والوں کے لواحقین کو 2 لاکھ روپے اور زخمیوں کو 50 ہزار روپے کی مالی امداد دینے کی ہدایت کی ہے۔

بی ایس پی کی صدر اور سابق وزیر اعلیٰ مایاوتی نے اپنے ٹوئٹ میں کہا کہ ’’اتر پردیش کے فتح پور چندریکا دیوی مندر سے واپس آنے والے عقیدت مندوں سے بھری ٹریکٹر ٹرالی کے الٹنے اور تالاب میں گرنے سے 26 لوگوں کی موت ہو گئی اور کئی دیگر زخمی ہو گئے۔ انتہائی افسوسناک خبر ہے۔ متاثرین کے اہل خانہ سے میری گہری تعزیت۔ حکومت جلد از جلد ان سب کی مدد کرے۔‘‘