اناؤ ریپ معاملہ: پرینکا کا بی جے پی پر حملہ، مظاہرہ کر رہے کانگریس کارکنان گرفتار

اناؤ عصمت دری کی متاثرہ کے ساتھ پیش آئے سڑک حادثہ کے بعد بی جے پی بری طرح گھرتی ہوئی نظر آ رہی ہے اور حزب اختلاف کی جماعتیں پارلیمنٹ سے لے کر سڑکوں تک سراپا احتجاج ہیں۔

اس معاملہ پر کانگریس جنرل سکریٹری پرینکا گاندھی نے بی جے پی پر حملہ بولا ہے۔ انہوں نے ملزم بی جے پی رکن اسمنبلی سینگر کے خلاف سخت کارروائی کا مطالبہ کیا ہے۔ انہوں نے ٹوئٹ کر کے کہا، ’’ہم کلدیپ سینگر جیسے لوگوں کی سیاسی پشت پناہی آخر کیوں کرتے ہیں اور کیوں متاثرہ افراد کو اکیلے لڑائی لڑنے کے لئے چھوڑ دیا جاتا ہے؟‘‘

پرینکا گاندھی نے مزید کہا، ’’مقدمہ میں صاف ہے کہ خاندان کو دھمکیاں دی جا رہی تھیں۔ انہوں نے حادثہ کا بھی خدشہ ظاہر کیا تھا۔ خدا کے واسطے وزیر اعظم صاحب، مجرم اور اس کے بھائی کو آپ کی پارٹی سے مل رہے سیاسی تحفظ کو دینا بند کیجیے۔‘‘

ادھر لکھنؤ میں اناؤ عصمت دری متاثرہ کے حق میں انصاف کا مطالبہ کرتے ہوئے کانگریس کارکنان نے احتجاجی مظاہرہ کیا۔ اس احتجاجی مظاہرہ کے دوارن یو پی پولس نے متعدد کانگریسی کارکنان کو حراست میں لے لیا۔

غور طلب ہے کہ اتوار کے روز اناؤ ریپ کیس کی متاثرہ اپنے اہل خانہ اور وکیل کے ساتھ رائے بریلی جیل میں قید اپنے چچا سے ملاقات کے لئے جا رہی تھی۔ اس درمیان ایک ٹرک نے ان کی کار کو زوردار ٹکر مار دی۔ اس حادثہ میں متاثرہ کی چچی اور خالہ موقع پر ہی ہلاک ہو گئیں، جبکہ متاثرہ اور ان کے وکیل کو شدید چوٹیں آئیں ہیں۔ زخمی حالت میں دونوں کو اسپتال میں داخل کرایا گیا۔

اطلاعات کے مطابق اس حادثہ کے بعد بی جے پی رکن اسمبلی کلدیپ سینگر کے خلاف قتل کا مقدمہ درج ہو گیا ہے۔ خبروں کے مطابق اس معاملہ میں 10 کے خلاف نامزد رپورٹ اور 15 سے 20 دیگر لوگوں کے خلاف مقدمہ درج کیا گیا ہے۔