ترنمول کانگریس 2024 لوک سبھا انتخاب تنہا لڑے گی، ممتا بنرجی کے اعلان نے اپوزیشن اتحاد کو دیا جھٹکا

آئندہ سال یعنی 2024 میں ہونے والے لوک سبھا انتخاب کو لے کر سبھی قومی و ریاستی پارٹیوں نے تیاریاں ابھی سے ہی شروع کر دی ہیں۔ بی جے پی کے خلاف ایک مضبوط اپوزیشن تیار کرنے کے لیے چھوٹی بڑی پارٹیوں کا اتحاد بنانے کی کوششیں بھی زور و شور سے جاری ہیں۔ اس درمیان مغربی بنگال کی وزیر اعلیٰ ممتا بنرجی نے ایک ایسا اعلان کر دیا ہے کہ اپوزیشن اتحاد کی کوششوں کو ایک شدید جھٹکا پہنچایا ہے۔

ممتا بنرجی نے جمعرات کے روز واضح کر دیا ہے کہ ترنمول کانگریس 2024 کا لوک سبھا انتخاب تنہا لڑے گی۔ یعنی انھوں نے اپوزیشن اتحاد میں شامل ہونے کا ارادہ ترک کر دیا ہے۔ ممتا بنرجی نے کہا ہے کہ ٹی ایم سی کا اتحاد براہ راست عوام کے ساتھ ہوگا۔

ایسے ماحول میں جب کہ کئی اپوزیشن لیڈران بی جے پی کے خلاف ایک پلیٹ فارم پر جمع ہونے کی تیاری کر رہے ہیں اور ریلیاں بھی ہو رہی ہیں، ترنمول کانگریس کا علیحدہ انتخاب لڑنے کا فیصلہ فکر میں اضافہ کرنے والا ہے۔ تمل ناڈو کے وزیر اعلیٰ ایم کے اسٹالن نے اپنے یومِ پیدائش پر بدھ کے روز چنئی میں ریلی کی تھی۔ اس میں کانگریس صدر ملکارجن کھڑگے اور اکھلیش یادو سمیت کئی اپوزیشن لیڈران پہنچے تھے، جس سے مضبوط اپوزیشن اتحاد کی امید پیدا ہو گئی تھی۔ لیکن ممتا بنرجی کا اعلان دیگر اپوزیشن پارٹیوں کے لیے تشویش کا باعث ہے۔

2024 لوک سبھا انتخاب میں تنہا لڑنے سے متعلق ممتا بنرجی کا اعلان آج مغربی بنگال میں ایک اسمبلی سیٹ کے لیے ہوئے ضمنی انتخاب کا نتیجہ برآمد ہونے کے بعد سامنے آیا ہے۔ ساگردگھی اسمبلی سیٹ پر ضمنی انتخاب میں کانگریس امیدوار نے جیت حاصل کی ہے اور غالباً ممتا اپنی شکست سے بہت مایوس ہوئی ہیں۔ ساگردگھی کا نتیجہ برآمد ہونے کے بعد بنرجی کا یہ بیان بھی سامنے آیا ہے کہ بی جے پی نے اس سیٹ پر اپنے ووٹ کانگریس کو منتقل کر دیئے۔