مہاراشٹر کے بیڈ میں ٹرک نے 6 لوگوں کو کچلا، سڑک پر بچھی لاشیں، ڈرائیور فرار

مہاراشٹر کے بیڈ ضلع میں پیر کی دیر رات قومی شاہراہ 52 پر ایک بڑا حادثہ پیش آیا۔ یہاں ایک تیز رفتار ٹرک نے 6 لوگوں کو کچل دیا۔ یہ لوگ ایک حادثہ کی شکار گاڑی کو سڑک سے ہٹا رہے تھے کہ اچانک ٹرک انہیں کچلتے ہوئے آگے نکل گئی جس سے موقع پر ہی ان سبھی کی موت ہو گئی۔ حادثے کے بعد سڑک پر لوگوں کی لاشیں بچھی دیکھ کر لوگوں کے رونگتے کھڑے ہو گئے۔

پولیس افسر نے بتایا کہ رات تقریباً ساڑھے 8 بجے قومی شاہراہ 52 کے گڑھی گاؤں کے پاس ایک کار ڈیوائڈر پر چڑھ گئی۔ جب کچھ لوگ کار کو ہٹانے میں لگے ہوئے تھے تبھی رات قریب 11 بجے ایک ٹرک نے انہیں کچل دیا۔ اس میں 6 لوگوں کی موت ہو گئی جبکہ ایک زخمی ہے۔ پولیس فرار ٹرک ڈرائیور کو تلاش کر رہی ہے۔

موقع پر پہنچے افسروں نے بتایا کہ گیورائی کے دیپک اٹکرے کے ذریعہ چلائی جا رہی کار یہاں قریب 100 کلومیٹر دور گڑھی گاؤں کے پاس قومی شاہراہ 52 کے ایک حصے پر ڈیوائڈر پر چڑھ گئی۔ اس کار کو ہٹانے کے لیے کچھ لوگ کوشش کر رہے تھے کہ اس دوران یہ خوفناک حادثہ پیش آیا۔ پولیس نے مرنے والوں کی شناخت بالو اٹکرے، بھاگوت پرالکر، سچن ننواورے، منوج کرانڈے، کرشن جادھو اور دیپک ثریہ کے طور پر کی ہے۔ یہ سبھی بیڈ کے گیورائی کے باشندے تھے۔

واضح رہے کہ اس سے پہلے مہاراشٹر کے شولا پور میں بھی شدید بارش کی وجہ سے بی جے پی کے سابق ایم ایل اے آر ٹی دیشمکھ کی موت ہو گئی تھی۔ یہ حادثہ پیر کو 4.15 بجے لاتور-تنجا پور-شولا پور راستے پر پیش آیا۔ بیلکنڈ کے پاس ایک فلائی اوور پر کار سڑک سے پھسل گئی اور حادثے کی شکار ہو گئی۔

اطلاع کے مطابق دیشمکھ اپنی ایس یو وی گاڑی میں سفر کر رہے تھے تبھی ان کی گاڑی بارش کی وجہ سے سڑک پر جمع پانی کے سبب پھسل گئی اور بے قابو ہوکر فلائی اوور کی ریلنگ سے ٹکرا گئی۔ گاڑی دو بار پلٹنے سے پوری طرح تباہ ہو گئی۔ حادثے میں آر ٹی دیشمکھ کو شدید چوٹیں آئیں اور انہیں فوراً نزدیکی نجی اسپتال میں لے جایا گیا جہاں ڈاکٹروں نے انہیں مردہ قرار دے دیا۔