متھرا کے ورنداون میں دردناک حادثہ، جمنا میں اسٹیمر پلٹنے سے 10 افراد کی موت، کئی اب بھی لاپتہ

متھرا ضلع کے ورنداون میں جمعہ کے روز دردناک حادثہ پیش آیا۔ یہاں شرنگار گھاٹ کے پاس ایک اسٹیمر پلٹنے سے کئی عقیدتمند جمنا ندی میں ڈوب گئے۔ اسٹیمر پر تقریباً 33 عقیدتمند سوار تھے، جن میں سے 10 کی ڈوبنے سے موت ہو گئی جبکہ 15 لوگوں کی جان بچا لی گئی۔ 8 افراد اب بھی لاپتہ بتائے جا رہے ہیں۔ جائے وقوع پر پولیس اور غوطہ خوروں کی ٹیم ریسکیو آپریشن میں مصروف ہے۔ یہ سبھی عقیدتمند پنجاب کے لدھیانہ سے بانکے بہاری کا دَرشن کرنے پہنچے تھے۔

میڈیا رپورٹس کے مطابق جمنا ندی سے 25 لوگوں کو باہر نکالا گیا ہے۔ ان میں سے 15 کی جان بچ گئی ہے، لیکن 10 لوگ مردہ قرار دیے گئے ہیں۔ بچائے گئے 15 لوگوں میں سے جن کی حالت سنگین ہے، انھیں ایمبولنس کی مدد سے بغرض علاج اسپتال میں داخل کرایا گیا ہے۔ لاپتہ 8 لوگوں کی تلاش کی جا رہی ہے، لیکن فی الحال کچھ پتہ نہیں چل سکا ہے۔

اس حادثہ کی سنگینی کو دیکھتے ہوئے پولیس و انتظامیہ کے اعلیٰ افسران جائے وقوع پر پہنچ گئے ہیں۔ اسٹیمر حادثہ کے بعد وزیر اعلیٰ یوگی آدتیہ ناتھ کا رد عمل بھی سامنے آیا ہے۔ انھوں نے واقعہ پر افسوس ظاہر کیا اور افسران کو جائے حادثہ پر پہنچنے اور راحت و بچاؤ کاری میں تیزی لانے کی ہدایت دی۔ انھوں نے مہلوکین کے گھر والوں کے تئیں اپنی ہمدردی کا اظہار بھی کیا۔