کانوڑ یاترا: دہلی کے کالندی کنج سے بدر پور اور نوئیڈا تک آدھی سڑک 23 جولائی تک بند رہے گی

دہلی کے کالندی کنج سے نوئیڈا اور بدر پور جانے والوں کے لیے یہ اہم خبر ہے۔ دہلی ٹریفک پولیس نے منگل  یعنی 15 جولائی کو کہا کہ کالندی کنج اور آس پاس کے علاقوں میں 23 جولائی تک ٹریفک پر پابندی رہے گی۔ یہ فیصلہ کانوڑیوں کی بغیر کسی روک ٹوک کی  نقل و حرکت اور عوام کی حفاظت کو مدنظر رکھتے ہوئے لیا گیا ہے۔ ٹریفک پولیس نے اپنی ایڈوائزری میں کہا کہ آنے والے دنوں میں کاوڑیوں کی ایک بڑی تعداد نوئیڈا، کالندی کنج اور آگرہ کینال روڈ کے راستے فرید آباد، گروگرام اور راجستھان کی طرف سفر کرنے کی امید ہے۔

آگرہ کینال روڈ کا آدھا حصہ (کالندی کنج سے بدر پور تک) بند رہے گا، اور کالندی کنج سے نوئیڈا روڈ کا آدھا حصہ بھی باقاعدہ ٹریفک کے لیے بند رہے گا۔ ٹریفک پولیس کے مطابق، یاترا کے دوران ان راستوں پر بہت زیادہ بھیڑ ہونے کی امید ہے۔

تاخیر سے بچنے کے لیے مسافروں کو مشورہ دیا گیا ہے کہ وہ نوئیڈا سے دہلی جانے کے لیے کالندی کنج کے بجائے ڈی این ڈی فلائی اوور یا آشرم مارگ کا استعمال کریں اور آشرم اور ڈی این ڈی کے لیے بدر پور کے راستے متھرا روڈ کا استعمال کریں۔ ایڈوائزری میں کہا گیا ہے کہ ایمبولینسز، فائر بریگیڈز اور پولیس کی گاڑیوں کو محدود راستوں پر جانے کی اجازت ہوگی تاہم انہیں ضروری ڈیوٹی کے علاوہ وہاں جانے سے گریز کرنے کا مشورہ دیا گیا ہے۔

خبر رساں ایجنسی کے مطابق دہلی پولیس کے 5000 سے زائد اہلکار اور نیم فوجی دستوں کی تقریباً 50 کمپنیاں (5000 سے زائد اہلکار) دہلی کے حساس علاقوں میں تعینات کی گئی ہیں۔ کانوڑ  یاترا 22 جولائی تک جاری رہے گی۔ مندر اور مرکزی راستوں  کی سی سی ٹی وی اور ڈرون گشت سے نگرانی کی جائے گی۔