’’جو رام کے نہیں، وہ عوام کے کیا ہوں گے؟‘‘، رام مندر نذرانے میں چوری کے معاملے پر ڈمپل یادو کا شدید رد عمل

اتر پردیش کے مین پوری حلقہ سے رکن پارلیمنٹ اورسماج وادی پارٹی کے صدر اکھلیش یادو کی اہلیہ ڈمپل یادو نے رام مندر کے عطیات کی چوری کے معاملے پر بھارتیہ جنتا پارٹی (بی جے پی) کو سخت نشانہ بنایا ہے۔ انہوں نے کہا کہ بی جے پی تکبر میں ڈوبی ہوئی ہے اور آئندہ انتخابات میں سماج وادی پارٹی مکمل اکثریت کے ساتھ حکومت بنائے گی۔

ڈمپل یادو نے دعویٰ کیا کہ سماج وادی پارٹی نے ایودھیا میں رام مندر کا مسئلہ سب سے پہلے اٹھایا تھا۔ انہوں نے الزام لگایا کہ رام مندر کی تعمیر میں کروڑوں روپے کا گھپلا ہوا ہے۔ انہوں نے کہا کہ ’’جو رام کے نام کا سہارا لے کر اقتدار میں آنے تھے، جب وہ انہیں کے نہیں ہوئے تو عام لوگوں کے کیا ہوں گے؟‘‘ انہوں نے ایودھیا میں مبینہ چوری کے معاملے کو کروڑوں عقیدت مندوں کے عقیدے سے متعلق بتاتے ہوئے کہا کہ یہ چوری تقریباً 3 سال سے جاری ہے۔

مین پوری کی ایم پی ڈمپل یادو نے تعلیمی نظام پر بھی سوال اٹھائے۔ انہوں نے کہا کہ بی جے پی حکومت نے تقریباً 25 ہزار اسکولوں کو بند کردیا ہے اور حکومت نہیں چاہتی کہ بچے تعلیم حاصل کریں۔ انہوں نے نیٹ پیپر لیک کیس کا حوالہ دیتے ہوئے کہا کہ اس میں طلباء نے اپنی جان تک دے دی لیکن مرکزی وزیر تعلیم دھرمیندر پردھان نے استعفیٰ نہیں دیا۔