اوم برلا کے رشتہ دار کے گھر پر چوروں نے کیا ہاتھ صاف، 1 کروڑ کی چوری سے متھرا پولیس میں ہڑکمپ

متھرا: لوک سبھا کے اسپیکر اوم برلا کے ایک رشتہ دار کپڑا کاروباری کے گھر ایک کروڑ روپے کی چوری کا معاملہ سامنے آیا ہے۔ پولیس اس معاملے کو چیلنج کے طور پر لے رہی ہے۔ ایس ایس پی نے اس واقعہ کا راز فاش کرنے کے لیے 6 ٹیمیں لگا دی ہیں۔ پولیس سی سی ٹی وی فوٹیج کے ذریعہ بغیر نمبر کی کار کی گھیرابندی میں لگی ہے۔ وہیں فوٹیج میں قید دو شاطروں کی شناخت کرنے کی کوشش کی جا رہی ہے۔ کاروباری کے نوکر اور نزدیکی سے بھی پوچھ تاچھ کی گئی ہے۔ کچھ مشتبہ لوگ حراست میں بھی لیے گئے ہیں۔

ہائی وے تھانہ علاقہ کے تحت گووردھن روڈ واقع شری جی شیواسا اسٹیٹ میں منگلم ساڑی شو روم کے ڈائریکٹر اور کاروباری سشیل دیوان اپنے کنبہ کے ساتھ رہتے ہیں۔ وہ لوک سبھا اسپیکر اوم برلا کے رشتہ دار ہیں۔ منگل کی صبح وہ اپنے کنبہ کے ساتھ گووردھن سیوا اور بھنڈارا میں شامل ہونے گئے تھے۔ شام قریب 5 بجے وہ لوٹے تو گھر کے خاص دروازے سمیت کمروں کے تالے ٹوٹے ہوئے تھے۔ چور تجوری میں رکھے ایک کروڑ روپے کے زیورات اور نقدی لے گئے تھے۔ چوروں نے واقعہ کو انجام دینے میں بغیر نمبر کی آئی-20 کار کا استعمال کیا تھا۔ چوری کے اس واقعہ سے محکمہ میں سنسنی پھیل گئی ہے۔

ایس ایس پی شیلیش کمار پانڈے نے واقعہ کو سنجیدگی سے لیتے ہوئے ایس او جی، سواٹ، سرویلانس، کوتوالی نگر اور ہائی وے تھانے کی چھ ٹیمیں راز فاش کرنے میں لگا دی ہیں۔ پولیس نے گھر میں کام کرنے والے ایک ملازم پنٹو سے بھی پوچھ تاچھ کی ہے۔ ذرائع کے مطابق پولیس کئی مشتبہ لوگوں کو حراست میں لے کرپوچھ تاچھ کر رہی ہے۔ پولیس کی ایک ٹیم سی سی ٹی وی فوٹیج کھنگالنے میں لگی ہے۔ اب تک درجنوں سی سی ٹی وی فوٹیج دیکھے جا چکے ہیں۔ پولیس اسی فوٹیج کی بنیاد پر واقعہ میں استعمال ہونے والی بغیر نمبر کی گاڑی کی تلاش میں لگی ہے۔ وہیں گھر کے فوٹیج میں قید کار سوار دو شاطروں کی پہچان کرنے کی بھی پولیس کوشش کر رہی ہے۔

کاروباری سشیل دیوان نے ہائی وے تھانے میں رپورٹ درج کرائی ہے۔ اس میں کہا گیا ہے کہ جب وہ گھر پر نہیں تھے تو چور ان کے گھر میں گھس گئے اور لوہے کی تجوری کا لاک توڑ کر زیورات اور نقدی لے گئے۔ رپورٹ میں سونے کے پانچ کالر سیٹ، چھ چوڑی، دو کڑے، چار زنجیر، 12 انگوٹھی، 3 گنّی سونے کی، ایک براسلیٹ، ایک دستی، تین جوڑی کان کے جھالے، چاندی کے 80 سکے، 105 گرام وٹھر سونا، ایک ٹائمیکس کی گھڑی کے علاوہ کئی روپیوں کی گڈی چوری ہو جانے کا ذکر کیا گیا ہے۔