شمال مغربی ہندوستان میں برفباری، میدانی علاقوں میں بارش؛ جموں و کشمیر میں دو شاہراہیں بند

شمالی ایران اور اس سے ملحقہ بحیرہ کیسپین کے اوپر سرگرم مغربی طلاطم کے اثر کی وجہ سے شمال مغربی ہندوستان میں ایک بار پھر موسم بدل گیا ہے۔ جموں و کشمیر اور ہماچل پردیش کے بالائی علاقوں میں شدید برف باری ہوئی اور وادیوں اور میدانی علاقوں میں بارش ہوئی ہے۔ پنجاب اور ہریانہ سمیت میدانی علاقوں میں تیز ہواؤں اور گرج چمک کے ساتھ ہلکی بارش ریکارڈ کی گئی ہے۔ آنے والے ہفتے میں بھی اسی طرح کے موسمی حالات برقرار رہنے کا امکان ہے۔ ہماچل پردیش کے شملہ، کلو اور منڈی میں پیر کو آندھی کا یلو الرٹ جاری کیا گیا ہے۔

ہندوستان کے محکمہ موسمیات (آئی ایم ڈی) کے مطابق شمال مغربی راجستھان اور اس سے ملحقہ علاقوں میں نچلی سطح پر طوفانی ہوائیں چل رہی ہیں۔ وہیں شمال مغربی راجستھان سے شمالی مدھیہ پردیش تک نچلے ٹراپوسفیئر میں کم دباؤ والا علاقہ برقرار ہے۔ توقع ہے کہ 2 اپریل کو شمال مغربی ہندوستان میں ایک نیا مغربی طلاطم فعال ہوگا۔ موسم سے متعلق ان نظاموں کے اثر سے جموں و کشمیر، لداخ، گلگت، بلتستان اور مظفرآباد میں اتوار کو ہلکی بارش ہوئی۔ ہماچل پردیش، اتراکھنڈ، پنجاب، ہریانہ، مشرقی اور مغربی راجستھان میں کچھ مقامات پر ہلکی بارش اور ژالہ باری ہوئی۔

آئی ایم ڈی کے مطابق 30 مارچ اور 2-3 اپریل کو گرج چمک کے ساتھ 30-50 کلومیٹر فی گھنٹہ کی رفتار سے ہوائیں چلنے کے ساتھ ہلکی بارش اور برفباری متوقع ہے۔ اسی طرح کے حالات ہماچل پردیش اور اتراکھنڈ میں 4 اپریل کو رہیں گے۔ اتراکھنڈ میں 30 مارچ کو ژالہ باری بھی متوقع ہے۔ وہیں پنجاب، ہریانہ، چنڈی گڑھ، دہلی، اتر پردیش اور راجستھان میں 30-31 مارچ کے دوران 30-50 کلومیٹر فی گھنٹہ کی رفتار سے گرج چمک کے ساتھ طوفان، آسمانی بجلی گرنے اور تیز ہوائیں چلنے کا امکان ہے۔ دریں اثنا، شمال مشرقی ہندوستان اور اس سے ملحقہ مشرقی ہندوستان میں اس ہفتے گرج چمک کے ساتھ طوفان، بجلی اور تیز ہواؤں کے ساتھ وسیع پیمانے پر بارش کا امکان ہے۔ شمال مشرقی ہندوستان میں بھی 30 مارچ سے 1 اپریل تک ہلکی بارش کا امکان ہے۔ جنوبی جزیرہ نما ہندوستان میں اس ہفتے گرج چمک کے ساتھ بارش، بجلی چمکنے اور تیز ہواؤں کے ساتھ وقفہ وقفہ پر بارش کا امکان ہے۔

اتوار کو ہماچل پردیش کے روہتانگ پاس اور دیگر اونچائی والے علاقوں میں برفباری ہوئی۔ کلّو اور لاہول سپتی اضلاع کی اونچی چوٹیوں پر اتوار کی صبح سے دوپہر تک برفباری ہوئی۔ روہتانگ پاس میں 20 سینٹی میٹر، کوکسار میں 3 سینٹی میٹر، شکولہ میں 15 سینٹی میٹر، کنزوم پاس میں 15 سینٹی میٹر اور برلاچا میں 20 سینٹی میٹر برف درج کی گئی۔ برفباری کے باعث شنکولہ ٹاپ سے گاڑیوں کی آمدورفت بند ہوگئی ہے۔ سیاحتی شہر منالی سے اٹل ٹنل روہتانگ کی طرف جانے والا ٹریفک دوپہر تک متاثر رہا۔ شملہ اور دھرم شالہ سمیت درمیانی اور زیریں علاقوں میں بارش ہوئی۔ اس سے ہماچل پردیش میں ایک بار پھر سردی بڑھ گئی ہے۔