دیوالی کے بعد دہلی میں موسم بدستور خراب، آلودگی میں کمی کے لیے دہلی حکومت بارش کا کر رہی انتظار!

دیوالی کے دوران آلودگی پر قابو پانے کے حکومت کے دعووں کے باوجود دہلی کی فضائی حالت میں کوئی بہتری نہیں آئی ہے۔ شہر میں دھند اور آلودگی بدستور چھائی ہوئی ہے، جس سے شہریوں کو شدید دشواریوں کا سامنا ہے۔ بڑھتی آلودگی کو لے کر عوامی اور سیاسی سطح پر حکومت کو سخت تنقید کا سامنا کرنا پڑ رہا ہے۔ اسی پس منظر میں دہلی کے وزیر ماحولیات منجندر سنگھ سرسا نے آلودگی پر قابو پانے اور موسم کو بہتر بنانے کے لیے حکومت کی جانب سے کئے گئے اقدامات کی تفصیلات پیش کیں۔

دہلی کے وزیر ماحولیات نے کہا کہ راجدھانی میں آلودگی کو کم کرنے کے لیے 3 اہم اقدامات کیے جا رہے ہیں۔ انہوں نے بتایا کہ گاڑیوں سے ہونے والی آلودگی پر کنٹرول کیا جا رہا ہے، پی ایم 2.5 آلودگی کو کم کرنے کے لیے تعمیراتی سرگرمیوں کو کنٹرول کیا جا رہا ہے اور دہلی کے اندر موجود صنعتوں کی نگرانی کی جا رہی ہے۔ انہوں نے مزید کہا کہ دہلی تقریباً 3 کروڑ لوگوں کا گھر ہے اور 50 کلومیٹر کے دائرے میں آس پاس کے علاقوں جیسے نوئیڈا اور غازی آباد کی آلودگی بھی راجدھانی کی ہوا کے معیار کو متاثر کرتی ہے۔

وزیر ماحولیات منجندر سنگھ سرسا نے کہا کہ ایئر کوالٹی انڈیکس (اے کیوآئی) کم ہونا لوگوں کے لیے بہتر ہے۔ انہوں نے بتایا کہ وزیر اعلیٰ ریکھا گپتا کی حکومت آلودگی کو کم کرنے کے لیے ایک جامع منصوبہ پر کام کر رہی ہے۔ سرسا نے کہا کہ ان کا ’وار روم‘  کافی بڑا ہے اور اس کی دن بھر مسلسل نگرانی کی جاتی ہے تاکہ آلودگی پر قابو پانے کے لیے بروقت کارروائی کی جا سکے۔

سرسا نے بتایا کہ آلودگی کو کم کرنے کی حکمت عملیوں میں سے کلاوڈ  سیڈنگ یا مصنوعی بارش ایک حصہ ہے ۔ انہوں نے کہا کہ ایک بار جب یہ عمل نافذ ہو جائے گا تو اس کے نتائج واضح ہوں گے اور جب بارش ہو گی تو آلودگی میں ضرور کمی آئے گی۔ ان کا خیال ہے کہ بارش سے راجدھانی میں ہوا کے معیار میں بہتری آئے گی اور لوگوں کو راحت ملے گی۔

ماہرین کا کہنا ہے کہ دیوالی کے بعد راجدھانی میں کہر اور ا سموگ کی سطح ہمیشہ بڑھ جاتی ہے، اس لیے ایسے اقدامات ضروری ہیں۔ سرسانے دعویٰ کیا کہ دہلی حکومت آلودگی پر قابو پانے اور موسم میں بہتری کے اقدامات کے ذریعے لوگوں کو فوری راحت فراہم کرنے کی کوشش کر رہی ہے۔ عوام آنے والے دنوں میں کلاوڈ سیڈنگ اور دیگر اقدامات کے اثرات کا تجربہ کر سکیں گے۔

اس دوران شہریوں سے بھی اپیل کی گئی ہے کہ وہ گاڑیوں کے استعمال اور تعمیراتی کاموں میں محتاط رہیں اور حکومت کی طرف سے دی گئی ہدایات پر عمل کریں، تاکہ ہوا کے معیار میں بہتری ممکن ہو سکے۔