10 ریاستوں کے لیے آئندہ 24 گھنٹے تشویش ناک! کہیں طوفانی بارش اور تیز ہواؤں کا ریڈ الرٹ، کہیں لوگوں کو تپش کرے گی پریشان

ہندوستان کی کئی ریاستوں میں اس وقت شدید گرمی پڑ رہی ہے۔ دہلی، اتر پردیش، بہار، راجستھان، مدھیہ پردیش، کرناٹک، تلنگانہ اور آندھرا پردیش سمیت شمالی اور جنوبی ہندوستان کے بیشتر حصوں میں لوگوں کو شدید تپش اور گرم ہواؤں کا سامنا کرنا پڑ رہا ہے۔ درجۂ حرارت مسلسل بڑھ رہا ہے، جس سے لوگوں کی پریشانی بھی بڑھ گئی ہے۔ لیکن کچھ خطوں میں تیز آندھی اور بارش جیسے حالات بھی پیدا ہوئے ہیں۔ یہی وجہ ہے کہ محکمۂ موسمیات نے کئی ریاستوں میں تیز بارش، آندھی اور طوفان کا الرٹ جاری کر دیا ہے۔ محکمہ کے مطابق کچھ مقامات پر 70 کلومیٹر فی گھنٹہ کی رفتار سے تیز ہوائیں چل سکتی ہیں۔ کچھ علاقوں میں بارش اور طوفان کا الرٹ ہے، جہاں محکمہ موسمیات نے لوگوں کو محفوظ مقامات پر رہنے کا مشورہ دیا ہے۔

دہلی-این سی آر

موصولہ اطلاع کے مطابق دہلی اور این سی آر میں آئندہ چند دنوں تک گرمی مزید بڑھنے کا امکان ہے۔ محکمۂ موسمیات کا کہنا ہے کہ 15 اور 16 مئی کو دہلی کا زیادہ سے زیادہ درجۂ حرارت 41 ڈگری سیلسیس تک پہنچ سکتا ہے۔ دن کے وقت تیز دھوپ اور گرم ہوائیں چلیں گی۔ لوگوں کو دوپہر میں باہر نکلنے سے بچنے کا مشورہ بھی دیا گیا ہے۔ تاہم شام کے وقت ہلکے بادل چھانے کا امکان ہے، جس سے کچھ راحت مل سکتی ہے۔ 15 مئی کو دہلی کا زیادہ سے زیادہ درجۂ حرارت تقریباً 40 ڈگری اور کم سے کم درجۂ حرارت 27 ڈگری رہنے کا اندازہ ہے۔ 17 مئی سے گرمی مزید بڑھ سکتی ہے اور درجۂ حرارت 41 ڈگری تک پہنچ سکتا ہے۔ 18 اور 19 مئی کو بھی موسم تقریباً ایسا ہی رہے گا۔

مدھیہ پردیش

مدھیہ پردیش میں بھی موسم کافی گرم رہنے والا ہے۔ کئی علاقوں میں لو چلنے کا اندیشہ ہے، جبکہ کچھ حصوں میں بارش ہوگی اور تیز ہواؤں کے ساتھ اولے گر سکتے ہیں۔ چھترپور ضلع کے کھجوراہو میں درجۂ حرارت 45 ڈگری سے اوپر جا سکتا ہے، جبکہ پنچ مڑھی میں کم سے کم درجۂ حرارت تقریباً 19 ڈگری رہنے کی امید ہے۔ اندور، اجین، دھار، دیواس، رتلام اور گُنا جیسے اضلاع کے لیے محکمۂ موسمیات نے اورینج الرٹ جاری کیا ہے۔ آئندہ 24 گھنٹوں میں ان علاقوں میں شدید گرمی پڑ سکتی ہے۔

اتر پردیش

اتر پردیش میں بھی گرمی کا اثر مسلسل بڑھ رہا ہے۔ لکھنؤ، کانپور، پریاگ راج اور وارانسی سمیت کئی شہروں میں درجۂ حرارت 40 ڈگری کے پار جا سکتا ہے۔ مغربی یوپی میں گرم ہوائیں چلیں گی، جبکہ مشرقی یوپی میں نمی لوگوں کو پریشان کر سکتی ہے۔ محکمۂ موسمیات نے لوگوں کو دوپہر میں بلا ضرورت باہر نہ نکلنے کا مشورہ دیا ہے۔

بہار

بہار میں بھی شدید گرمی کا اثر دکھائی دے گا۔ پٹنہ، گیا اور بھاگلپور جیسے شہروں میں درجۂ حرارت 39 سے 41 ڈگری کے درمیان رہنے کا اندازہ ہے۔ کچھ مقامات پر شام کے وقت ہلکے بادل اور گرد بھری ہوائیں چل سکتی ہیں۔ گرمی بڑھنے سے بجلی اور پانی کی طلب بھی بڑھ سکتی ہے۔ جھارکھنڈ میں موسم کو لے کر حکومت الرٹ پر ہے۔ موسم خراب ہونے سے فصلوں کو نقصان پہنچنے کا اندیشہ بھی ظاہر کیا جا رہا ہے۔

راجستھان

راجستھان کے کئی اضلاع اس وقت شدید گرمی کی زد میں ہیں۔ پھلودی میں درجۂ حرارت 45.2 ڈگری، جیسلمیر میں 45.1 ڈگری اور سری گنگا نگر میں 44.8 ڈگری درج کیا گیا ہے۔ بیکانیر، جے پور اور بھرت پور کے کچھ علاقوں میں ہلکی بارش ہونے کا امکان ہے۔ محکمۂ موسمیات کا کہنا ہے کہ آئندہ 2 دنوں میں درجۂ حرارت میں 1 سے 2 ڈگری کی کمی آ سکتی ہے، لیکن 17 مئی کے بعد پھر سے گرمی بڑھ سکتی ہے۔

مہاراشٹر و گجرات

مہاراشٹر اور گجرات میں گرمی اور نمی دونوں کا اثر رہے گا۔ احمد آباد اور سورت میں تیز گرم ہوائیں چل سکتی ہیں۔ ممبئی اور پونے میں لوگوں کو چپچپی گرمی کا سامنا کرنا پڑ سکتا ہے۔ ودربھ علاقے میں درجۂ حرارت 42 ڈگری تک پہنچ سکتا ہے۔

میدانی علاقوں میں تپش بڑھے گی

اتراکھنڈ اور ہماچل پردیش کے میدانی علاقوں میں گرمی بڑھنے کا اندیشہ ظاہر کیا گیا ہے، جبکہ پہاڑی علاقوں میں موسم خوشگوار بنا رہے گا۔ دہرادون اور ہلدوانی میں درجۂ حرارت 35 ڈگری تک جا سکتا ہے۔ وہیں شملہ، منالی اور دھرمشالہ جیسے علاقوں میں ٹھنڈی ہوائیں لوگوں کو راحت دیں گی۔ کچھ اونچائی والے علاقوں میں ہلکی بارش بھی ہو سکتی ہے۔ تمل ناڈو میں موسم بدلنے کے آثار ہیں۔ خلیج بنگال میں بننے والے کم دباؤ کے سبب ریاست کے کئی حصوں میں اچھی بارش ہو سکتی ہے۔ محکمۂ موسمیات نے کوئمبٹور، تھینی اور نیلگری اضلاع میں شدید بارش کا الرٹ جاری کیا ہے۔ 19 مئی تک مغربی اور پہاڑی علاقوں میں مسلسل بارش ہونے کا امکان ظاہر کیا گیا ہے۔