کورونا مریض کو ایمبولنس سے 25 کلومیٹر لے جانے کے لئے ڈرائیور نے کی 42 ہزار روپے کی وصولی!

نوئیڈا: دہلی این سی آر میں شامل اتر پردیش کے شہر نوئیڈا میں ایک حیران کن واقعہ پیش آیا۔ یہاں کورونا سے متاثرہ ایک مریض کو اسپتال پہنچانے کے عوض میں ایمبولنس کے ڈرائیور نے 42 ہزار روپے کی وصولی کر ڈالی۔ مجبور تیماردار نے اتنی بڑی رقم دے تو دی لیکن اس کی اطلاع پولیس کو بھی کر دی۔ آج تک پر شائع رپورٹ کے مطابق، ایمبولنس کے ڈرائیور کی اس حرکت پر ایکشن میں آئی پولیس نے نمبر ٹریس کرتے ہوئے ڈرائیور کو پکڑ لیا۔ اس کے بعد ڈرائیور نے نہ صرف پولیس کے سامنے اپنی غلطی کا اعتراف کر لیا بلکہ بقیہ رقم لوٹانے کا بھی وعدہ کیا۔

رپورٹ کے مطابق، دہلی ہائی کورٹ کے ایڈوکیٹ اسیت کورونا سے متاثر ہو گئے تھے۔ ان کے علاوہ کنبہ کے دوسرے افراد پہلے ہی اس وائرس کی زد میں ہیں، اس کی وجہ سے ان کا چھوٹا بھائی وشنو انہیں دیکھ بھال کے لئے اپنے نوئیڈا سیکٹر 50 میں واقع گھر لے آیا تھا۔

پیر کے روز اسیت کی طبیعت اچانک خراب ہو گئی، جس کے سبب انہیں اسپتال لے جانے کی ضرورت پیش آئی۔ اس دوران وشنو نے ایک امبولنس پر کال کی۔ تھوڑی دیر بعد ایک نجی ایمبولنس ان کے گھر پر آ گئی۔ اس امبولنس کے ذریعے مریض کو لے کر وہ گریٹر نوئیڈا کے شاردا اسپتال پہنچے لیکن وہاں بیڈ خالی نہیں تھا۔ لہذا وشنو مریض کو لے کر پرکاش ہاسپیٹل کی طرف جانے لگے۔ وہاں بھی بیڈ خالی نہیں ہونے کی اطلاع ملنے پر وہ نوئیڈا ویسٹ میں واقع یتھارتھ اسپتال پہنچے۔

اس طرح اسپتالوں کا چکر لگانے کے دوران امبولنس کو 25 کلومیٹر کا سفر طے کرنا پڑا۔ اس کے عوض امبولنس کےک ڈرائیور نے وشنو سے 44 ہزار روپے طلب کئے۔ وشنو نے اتنی بڑی رقم پر اعتراض ظاہر کیا، مگر ڈرائیور ماننے کو تیار نہیں ہوا، لہذا وشنو نے 40 ہزار روپے پے ٹی ایم کے ذریعے بھیج دئے اور دو ہزار روپے ڈرائیور کو کیش دے دئے۔

مریض کو اسپتال میں داخل کرانے کے بعد وشنو نے اس کی اطلاع نوئیڈا پولیس کو دی۔ نوئیڈا پولیس نے گاڑی کا نمبر ٹریس کرتے ہوئے امبولنس کا پتا لگا لیا۔ پولیس کی سختی کے بعد امبولنس ڈرائیور نے جائز پیسے کاٹ کر بقیہ رقم واپس کرنے کا وعدہ کیا۔ امبولنس ڈرائیور نے پولیس کے سامنے اپنی غلطی کا بھی اعتراف کیا۔