شدید گرمی اور فضائی آلودگی کا گٹھ جوڑ لوگوں کی جان کا بنا دشمن، 30 سال میں 1.42 لاکھ اموات، رپورٹ میں انکشاف

ہندوستان میں فضائی آلودگی اور شدید گرمی لوگوں کے لیے مہلک ثابت ہو رہی ہے۔ گزشتہ 30 برسوں میں اس کے اثر سے 1,42,765 لوگوں کی جان جا چکی ہے۔ اس اعداد و شمار سے ظاہر ہوتا ہے کہ تبدیلیٔ آب و ہوا اور ماحولیاتی آلودگی کا گٹھ جوڑ اب لوگوں کے لیے سنگین صحت بحران بن چکا ہے۔ ’امرجالا‘ کی رپورٹ کے مطابق ممتاز سائنسی جریدہ ’جیو ہیلتھ‘ میں شائع تحقیق میں یہ بتایا گیا ہے کہ فضائی آلودگی کے انتہائی باریک ذرّات پی ایم 2.5 اور انتہائی گرمی دونوں مل کر نہ صرف ’ہیٹ اسٹروک‘ جیسے حالات پیدا کرتے ہیں بلکہ سانس کی بیماریاں، دل کا مرض، ذیابیطس کی پیچیدگیاں اور دماغ کے طریقہ کار پر بھی منفی اثر ڈالتے ہیں۔

پی ایم 2.5 یعنی 2.5 مائیکرو میٹر سے چھوٹے باریک ذرّے ہوا میں موجود گرد، سیاہی (بلیک کاربن)، سمندری نمک، سلفیٹ اور حیاتیاتی ذرات سے مل کر بنتے ہیں۔ یہ ذرّے اتنے باریک ہوتے ہیں کہ سانس کے ساتھ پھیپھڑوں کے اندر پہنچ کر خون کے بہاؤ میں سما سکتے ہیں، جس سے طویل مدتی صحت سے متعلق منفی اثرات پیدا ہوتے ہیں۔ مطالعہ میں سائنسدانوں نے 1990 سے 2019 کے درمیان دنیا بھر میں عالمی آب و ہوا اور آلودگی (پی ایم 2.5) کے اعداد و شمار کا تجزیہ کیا ہے۔

اسٹڈی کے نتیجہ سے ظاہر ہے کہ گزشتہ تین دہائیوں میں نہ صرف گرمی اور آلودگی کے واقعات پہلے سے زیادہ بار ہوئے ہیں بلکہ اس دوران پی ایم 2.5 کی سطح بھی کافی بڑھی ہے۔ سائنس دانوں کا اندازہ ہے کہ 1990 سے 2019 کے درمیان گرمی اور آلودگی سے بھرے دور میں پی ایم 2.5 میں آنے سے دنیا بھر میں 6,94,440 لوگوں کی اچانک موت ہوئی ہے۔

کلائیمیٹس ٹرینڈس کی رپورٹ میں یہ پایا گیا ہے کہ دہلی، پٹنہ، لکھنؤ، ممبئی اور کولکاتا جیسے بڑے شہروں میں بڑھتے درجہ حرارت کے ساتھ ساتھ پی ایم 2.5 سطح میں بھی خطرناک اضافہ دیکھا گیا ہے۔ زیادہ درجہ حرارت کیمیائی رد عمل کو تیز کرتا ہے۔ جس سے وولاٹائل آرگینک کمپاؤنڈس (وی او سی) کی مقدار بڑھتی ہے۔ یہ عنصر ہوا میں مل کر انتہائی زہریلے آلودگی پھیلانے والے پیدا کرتے ہیں۔

ہندوستان میں کیے گئے مطالعہ میں یہ انکشاف ہوا ہے کہ جب گرمی شدید ہوتی ہے اور اسی وقت پی ایم 2.5 کا سطح بھی بڑھا ہوتا ہے تو شرح اموات میں تیزی سے اضافہ ہوتا ہے۔ تقریباً 36 لاکھ اموات کے ڈاٹا کے تجزیہ میں یہ پایا گیا ہے کہ شدید گرم دنوں میں اگر پی ایم 2.5 کی سطح 10 مائیکروگرام فی کیوبک میٹر بڑھے تو اس دن اموات میں 4.6 فیصد تک کا اضافہ ہو سکتا ہے۔ یہ اعداد و شمار عام دنوں میں دیکھے گئے 0.8 فیصد کے اضافہ سے کئی گنا زیادہ ہے۔