آل انڈیا مسلم پرسنل لاء بورڈ کے نئے صدر کے نام کا اعلان، مولانا خالد سیف اللہ رحمانی کے نام پر سبھی متفق

مولانا خالد سیف اللہ رحمانی کو آل انڈیا مسلم پرسنل لاء بورڈ کا نیا صدر منتخب کیا گیا ہے۔ یہ اعلان ہفتہ کی شام کیا گیا اور جانکاری دی گئی کہ آل انڈیا مسلم پرسنل لاء بورڈ کے اراکین نے متفقہ طور پر مولانا خالد سیف اللہ رحمانی کے نام پر رضامندی ظاہر کی۔ قابل ذکر ہے کہ مدھیہ پردیش کے اندور شہر میں دو دن تک آل انڈیا مسلم پرسنل لاء بورڈ کی میٹنگ چلی، اس کے بعد نئے صدر کے نام پر مہر لگ گئی۔

واضح رہے کہ مسلم پرسنل لاء بورڈ کے صدر مولانا رابع حسنی ندوی کا گزشتہ دنوں انتقال ہو گیا تھا جس کے بعد بورڈ کے صدر کا عہدہ خالی ہو گیا تھا۔ مولانا رابع حسنی ندوی کا 13 اپریل 2023 کو انتقال ہوا جو کہ 2002 سے بورڈ کے صدر عہدہ کی ذمہ داری سنبھال رہے تھے۔ ان کے انتقال کے بعد آل انڈیا مسلم پرسنل لاء بورڈ کے اراکین کی کئی میٹنگیں ہوئیں، اور اب مولانا خالد سیف اللہ رحمانی کو بورڈ کا نیا صدر منتخب کر لیا گیا ہے۔

توجہ طلب ہے کہ مولانا خالد سیف اللہ رحمانی ان لوگوں میں سے ہیں جنھوں نے آل انڈیا مسلم پرسنل لاء بورڈ کی بنیاد رکھی تھی۔ یعنی مولانا رحمانی کا شمار بورڈ کے بانی اراکین میں ہوتا ہے۔ اس سے پہلے وہ آل انڈیا مسلم پرسنل لاء بورڈ کے جنرل سکریٹری کی ذمہ داری نبھا رہے تھے۔