تسلیم احمد نے ’سروودے بال ودیالیہ جعفر آباد‘ میں پرنسپل کے عہدہ کی ذمہ ادری سنبھالی

نئی دہلی: تعلیم کسی بھی قوم کی سماجی و اقتصادی ترقی کے لیے کافی اہم ہوتی ہے۔ یہ انسان کو کامیابی کی طرف لے جاتی ہے۔ تعلیم کے تئیں ملک گیر سطح پر این جی اوز اور سماج کے با اثر افراد مسلسل لوگوں کو بیدار کرنے کے لیے بڑے پیمانے پر مہم چلا رہے ہیں۔ تاہم اپنے اپنے علاقوں میں لائبریریز بھی قائم کی جا رہی ہیں۔

موجودہ وقت میں تعلیم کے فروغ میں پیش پیش رہنے والی تنظیمیں سول سروسز امتحانات پر فوکس کی ہوئی ہیں۔ یو پی ایس سی میں کامیابی کے بعد جس اسکول میں آپ نے پڑھائی کی ہو اور اسی اسکول میں آپ پرنسپل بن کر جائیں تو اس پل کی خوشی کا اندازہ لگانا مشکل ہے۔

گزشتہ روز ڈاکٹر ذاکر حسین میموریل سینئر سیکنڈری اسکول جعفر آباد دہلی میں تدریس کے فرائض انجام دینے والے تسلیم احمد نے جعفر آباد کے سروودے بال ودیالیہ جعفر آباد میں پرنسپل کے عہدہ کی ذمہ داری سنبھالی لی۔ اس کے بارے میں جیسے ہی علاقے کے لوگوں کو پتہ چلا تو مبارکباد دینے والوں کا تانتا لگ گیا۔

استاد تسلیم احمد نے ڈاکٹر ذاکر حسین اسکول جا کر پہلے استعفیٰ دیا جس کے بعد زینت محل اسکول جعفر آباد میں پرنسپل کے عہدہ کی ذمہ داری سنبھالی۔ اس موقع پر ذاکر حسین اسکول کے سابق پرنسپل ڈاکٹر محمد معروف خان، وائس پرنسپل اور انچارج محمد ریاض الحسن خان، زین العابدین کے علاوہ اُردو زبان کے محسن ماسٹر شمس الدین، ماسٹر معین احمد، ماسٹر ارشد احمد، ماسٹر شکیل احمد، ماسٹر عباس احمد، اوم پرکاش، محمد اقبال وائس پرنسپل، اقبال احمد ڈپٹی رجسٹرار، ماسٹر فہیم احمد، محمد شاہد، محمد مظاہر، ماسٹر حسرت علی، اخلاص احمد، شارب عظیم کے علاوہ اسکول کا تقریباً تمام اسٹاف بھی موجود تھا۔

اس موقع پر پرنسپل تسلیم احمد نے بتایا کہ میرے والد مرحوم ٹھیکیدار عبد الغفار کا تعلیم پر ہمیشہ زور رہتا تھا اور وہ اکثر کہتے تھے کہ جعفر آباد میں تعلیم کو بہتر بنانا ہے۔ میں ان کے اس خواب کو پورا کرنے کی کوشش کروں گا۔ انہوں نے مزید بتایا کہ اس اسکول سے ہی تعلیم حاصل کی ہے جبکہ دہلی یونیورسٹی سے لے کر جامعہ ملیہ اسلامیہ سے ایم اے ہسٹری، ایم ایس سی فزکس، بی ایڈ کرنے کے بعد اسسٹنٹ ٹیچر کی حیثیت سے ذاکر حسین اسکول 2002 میں جوائن کیا تھا، تب سے یہیں پر تدریسی خدمات انجام دے رہا تھا۔ حکومت کی جانب سے جعفر آباد اسکول ملنے پر وہ بہت خوش ہیں۔

اس موقع پر ڈاکٹر محمد معروف نے نیک خواہشات کا اظہار کرتے ہوئے کہا کہ ہم امید کرتے ہیں ڈاکٹر ذاکر حسین اسکول اور جعفر آباد اسکول کے تعلقات مزید بہتر ہوں گے، تو وہیں وائس پرنسپل ریاض الحسن خان نے کہا کہ تسلیم احمد ہمارے اسکول کے بچوں کے لئے بھی ایک رول ماڈل ثابت ہوں گے۔ ماسٹر شمس الدین نے کہا کہ آج ہمارے لئے فخر کی بات ہے کہ تسلیم احمد پرنسپل کے عہدہ پر فائز ہوئے ہیں۔ میں ان کو صمیم قلب سے مبارکباد پیش کرتا ہوں۔ ماسٹر تسلیم احمد مسلم سماج کے لئے ایک بہترین مثال ہیں اور مختلف خوبیوں کے مالک بھی۔ ایک استاد بچوں کیلئے آئیڈیل ہوتا ہے۔ تسلیم احمد سر کی شخصیت سے بچے بہت جلدی متاثر ہوتے ہیں اور ان کے جیسا بننا چاہتے ہیں۔

تسلیم احمد کے پرنسپل بننے سے جعفر آباد کے معزز افراد میں خوشی کی لہر دوڑ گئی ہے۔ لوگوں کا کہنا ہے کہ تسلیم احمد نے جعفر آباد کے بچوں کو تعلیم یافتہ بنانے میں اہم کردار ادا کیا ہے اور ان کے پڑھائے ہوئے بچے مختلف شعبو ں میں بہترین کارکردگی کا مظاہرہ کر رہے ہیں۔