تمل ناڈو: دردناک سڑک حادثہ میں 20 افراد ہلاک، تقریباً 2 درجن زخمی

تمل ناڈو کے تروپور ضلع واقع اویناشی شہر کے پاس جمعرات کی صبح روڈویز بس اور لاری کے درمیان ٹکر میں 20 لوگوں کی دردناک موت ہو گئی ہے۔ موصولہ اطلاعات کے مطابق مہلوکین میں 14 مرد اور 6 خواتین شامل ہیں۔ بتایا جا رہا ہے کہ اس اندوہناک حادثہ میں کم و بیش دو درجن افراد زخمی ہوئے ہیں۔

واقعہ کے بعد راحت اور بچاؤ کام فوری طور پر شروع ہو گیا اور پولس کی ٹیم بھی جائے وقوع کا معائنہ کرنے کے لیے پہنچ گئی ہے۔ پولس نے ہلاک شدگان میں پانچ خواتین کے شامل ہونے کی تصدیق کر دی ہے لیکن مقامی ذرائع کے مطابق مرنے والی خواتین کی تعداد 6 ہے۔ اس درمیان زخمیوں کو علاج کے لیے سرکاری اسپتال میں داخل کرایا گیا ہے جہاں کچھ کی حالت نازک بتائی جا رہی ہے۔

پولس نے اس پورے واقعہ کے تعلق سے میڈیا کو بتایا کہ حادثہ اس وقت ہوا جب ’كےایس آر ٹی سی‘ (کیرالہ اسٹیٹ روڈ ٹرانسپورٹ کارپوریشن) کی ایک وولوو بس سلیم سے تریوندرم جا رہی تھی۔ اس دوران 6 لین والے قوی شاہراہ پر مخالف سمت سے آنے والی ایک لاری اچھل کر بس کے سامنے آ گئی اور اس کے اندر جا گھسی۔یہ حادثہ اتنا شدید تھا کہ کسی بھی بس مسافر کو اپنی دفاع کا موقع تک نہیں ملا۔

پولس کا کہنا ہے کہ لاری پر ٹائلس لدے ہوئے تھے جس کی وجہ سے حادثے نے اتنی خوفناک شکل اختیار کر لی۔ اس حادثے میں وولوو بس کے پرخچے اڑ گئے اور جو آگ لگی، اس پر قابو پانا انتہائی مشکل ہو گیا۔ راحت اور بچاؤ اہلکاروں کو آگ بجھانے اور زخمیوں کو باہر نکالنے میں سخت محنت کرنی پڑی۔بچاؤ ٹیم کو بس میں سے ہلاک شدگان کی لاشوں اور زخمیوں كو باہر نکالنے کے لئے گیس کٹر کا استعمال کرنا پڑا۔ ابتدائی رپورٹ کے مطابق حادثہ کے وقت بس میں 48 مسافر سوار تھے۔