تمل ناڈو: 2 اکتوبر کو خواتین کے لیے مفت بس سفر کے توسیع شدہ منصوبہ کا آغاز کریں گے وزیر اعلیٰ وجے

تمل ناڈو کے وزیر اعلیٰ سی جوزف وجے جمعہ (2 اکتوبر) کو مہاتما گاندھی کے یوم پیدائش کے موقع پر خواتین کے لیے توسیع شدہ ’ویٹری ٹریول‘ منصوبہ کا آغاز کریں گے۔ اس منصوبہ کا افتتاح چنئی کے کوئمبیڈو بس ٹرمینس میں کیا جائے گا۔ اس پہل کے تحت مفت سفر کی سہولت اب عام سرکاری سٹی بسوں کے علاوہ ایکسپریس، ایل ایس ایس اور ڈیلکس بسوں میں بھی دستیاب ہوگی۔ اس سے ریاست بھر میں خواتین اور ٹرانس جینڈر مستفیدین کے لیے پبلک ٹرانسپورٹ کی سہولت کا دائرہ وسیع ہو جائے گا۔

مفت بس سفر پروگرام کی شروعات سابق ڈی ایم کے حکومت کے دور میں کی گئی تھی۔ موجودہ حکومت نے اس کا نام تبدیل کرکے ’ویٹری ٹریول‘ منصوبہ کر دیا ہے اور اس کے دائرے میں بسوں کی نئی کیٹیگریز کو شامل کیا ہے۔ توسیع شدہ منصوبہ سے متعلق جاری اعداد و شمار کے مطابق اس کے دائرے میں 12692 سرکاری بسیں آئیں گی۔ اس منصوبہ سے روزانہ 84 لاکھ خواتین کو فائدہ ملنے اور 16 لاکھ سے زیادہ یکطرفہ سفر ہونے کی امید ہے۔ منصوبہ کی توسیع کے بعد یہ سوال بھی اٹھ رہا ہے کہ مسافر بغیر کرایہ دیے کتنی دوری تک سفر کر سکیں گے۔ ساتھ ہی کیا اس سہولت کا استعمال چنئی، کوئمبٹور اور ناگرکوئل جیسے شہروں کے درمیان سفر کے لیے کیا جا سکے گا؟

دستیاب معلومات سے یہ واضح نہیں ہے کہ کوئی مسافر راستے میں مختلف بسیں تبدیل کر کے پوری طویل دوری کا سفر مفت میں کر سکتا ہے یا نہیں۔ کسی بس سروس کی مجموعی آپریشنل دوری اور منصوبہ کے تحت مفت سفر کے لیے مقررہ دوری کو الگ الگ سمجھنا ضروری ہے۔ دستیاب تفصیلات کے مطابق سرکاری ایکسپریس بسیں عام طور پر 30 سے 100 کلومیٹر کی دوری تک چلتی ہیں، جبکہ ایل ایس ایس بسیں تقریباً 30 سے 40 کلومیٹر اور ڈیلکس بسیں تقریباً 30 سے 50 کلومیٹر کی دوری طے کرتی ہیں۔

منصوبہ کی توسیع کے سلسلے میں جن روٹس کا ذکر کیا گیا ہے، ان میں تریچی-ڈنڈیگل، تنجاوور-ناگاپٹنم، تنجاوور-ویلنکنی، تنڈیونم-ولوپورم، وِردھاچلم-تروچی، کوئمبٹور-پلانی، پلانی-ڈنڈیگل، کوئمبٹور-ایروڈ، ایروڈ-سیلم اور مدورئی-ویرودھو نگر شامل ہیں۔ رپورٹ میں چنئی کو چنگل پٹو، تنڈیونم، ولوپورم، وردھاچلم، تریچی، ڈنڈیگل، مدورئی، ویرودھو نگر، کوول پٹی، ترونیل ویلی، ناگرکوئل اور کنیا کماری سے جوڑنے والی بس سروسز کی ممکنہ سیریز کا بھی ذکر کیا گیا ہے۔ اس منصوبہ کی توسیع کا مقصد زیادہ سرکاری بس سروسز کو مستفیدین کے لیے قابل رسائی بنانا ہے۔ یہ عام سٹی بسوں میں پہلے سے دستیاب مفت سفر کی سہولت کی توسیع ہے۔