تمل ناڈو: وزیر اعلیٰ وجے نے چھٹی سے آٹھویں جماعت کے لیے ناشتے کے توسیع شدہ منصوبے کا آغاز کیا

تمل ناڈو کے وزیر اعلیٰ سی جوزف وجے نے منگل (22 ستمبر) کو ’پیرونتھلائیور کامراج بریک فاسٹ اسکیم‘ کو توسیع دی۔ اس کے تحت ریاست بھر کے سرکاری اور سرکاری امداد یافتہ اسکولوں میں چھٹی سے آٹھویں جماعت تک کے طلبہ کو صبح مفت ناشتہ دیا جائے گا۔ وزیر اعلیٰ وجے نے چنئی کے تھروونمیور میں گاندھی گرام واقع کارپوریشن مڈل اسکول میں توسیع شدہ پروگرام کا افتتاح کیا۔ انہوں نے طلبہ کو پونگل پیش کیا اور پھر ان کے ساتھ بیٹھ کر ناشتہ کیا۔ اس توسیعی پروگرام میں مزید 15.30 لاکھ طلبہ شامل ہوں گے۔ مجموعی طور پر 44984 سرکاری اور سرکاری امداد یافتہ اسکولوں میں پڑھنے والے 34.64 لاکھ بچوں کو اب اس منصوبہ کا فائدہ ملے گا۔

ریاستی حکومت نے اس توسیع شدہ پروگرام کو نافذ کرنے کے لیے اضافی 217.63 کروڑ روپے مختص کیے ہیں۔ اسے چنگل پٹو ضلع کے مدورنتکم اسمبلی حلقے اور تروپور ضلع کے دھاراپورم کو چھوڑ کر تمام اضلاع میں شروع کیا گیا ہے، جہاں اسمبلی ضمنی انتخابات ہونے ہیں۔ ناشتے کا یہ منصوبہ بنیادی طور پر 2022 میں ڈی ایم کے حکومت کے دوران اس وقت کے وزیر اعلیٰ ایم کے اسٹالن نے شروع کیا تھا۔ شروع میں یہ منصوبہ سرکاری اسکولوں میں پہلی سے پانچویں جماعت تک کے طلبہ کے لیے تھا اور بعد میں اسے سرکاری امداد یافتہ اداروں تک بھی بڑھا دیا گیا۔ اس پروگرام کا مقصد بچوں میں غذائی قلت سے نمٹنے، اسکول میں بچوں کی حاضری بڑھانے اور طلبہ کو تعلیم درمیان میں چھوڑنے کے بجائے اسے جاری رکھنے کی ترغیب دینے کے مقصد سے شروع کیا گیا تھا۔

حال ہی میں توسیع سے قبل اس منصوبہ میں 37447 سرکاری اور سرکاری امداد یافتہ اسکولوں میں پڑھنے والے 19.34 لاکھ طلبہ شامل تھے۔ ٹی وی کے حکومت کے اقتدار میں آنے کے بعد اس پروگرام کا نام بدل کر ’پیرونتھلائیور کامراج بریک فاسٹ اسکیم‘ کر دیا گیا۔ بعد میں وجے نے اعلان کیا کہ اسے چھٹی، ساتویں اور آٹھویں جماعت تک بڑھایا جائے گا۔ اسے شروع کرنے کا پروگرام پہلے 17 ستمبر کو مقرر کیا گیا تھا، جو سماجی مصلح پیریار ای وی راماسامی کی سالگرہ کا دن تھا۔ اسے 22 ستمبر تک ملتوی کر دیا گیا، کیونکہ وجے تمل ناڈو میں صنعتی سرمایہ کاری لانے کے لیے لندن گئے ہوئے تھے۔

 قابل ذکر ہے کہ مقررہ ہفتہ وار مینو کے مطابق طلبہ کو پیر کو اپما، منگل کو کھچڑی، بدھ کو پونگل، جمعرات کو اپما اور جمعہ کو میٹھی ڈش پیش کی جائے گی۔ افسران کو یہ یقینی بنانے کی ہدایت دی گئی ہے کہ کھانا غذائیت سے بھرپور ہو اور صاف ستھرے ماحول میں تیار کیا جائے۔ وزیر اعلیٰ وجے نے افسران کو یہ بھی ہدایت دی کہ وہ کچن اور ڈائننگ ایریا کا باقاعدگی سے معائنہ کریں، صفائی برقرار رکھیں اور طلبہ کو دیے جانے والے کھانے کے معیار اور بروقت تقسیم پر سخت نظر رکھیں۔