اسٹینڈ اَپ کامیڈین سمے رینا کو سپریم کورٹ کی سخت پھٹکار، معذوروں کا مذاق اڑانے کے لیے بلا شرط معافی مانگنے کی ہدایت

اسٹینڈ اَپ کامیڈین سمے رینا، وپل گوئل اور دیگر کو سپریم کورٹ نے سخت پھٹکار لگائی ہے۔ عدالت نے انہیں معذوروں (پی ڈبلیو ڈی ایس) اور نادر بیماریوں سے متاثر لوگوں کا مذاق اڑانے والے غیر حساس چُٹکلے سنانے کے لیے بلا شرط معافی مانگنے کی ہدایت دی ہے۔ کیور ایس ایم اے (Cure SMA) کی طرف سے دائر کی گئی ایک عرضی پر سماعت کرتے ہوئے سپریم کورٹ نے اس کامیڈین کی سخت سرزنش کی۔ عرضی میں الزام لگایا گیا تھا کہ ان کامیڈین نے اپنے شو میں معذورں اور نادر بیماریوں کا مذاق اڑایا، جس سے لوگوں کے جذبات مجروح ہوئے۔

عدالت میں سماعت کے دوران سبھی کامیڈین جن میں سمے رینا بھی شامل ہیں، ذاتی طور سے موجود تھے۔ اٹارنی جنرل آر وینکٹ رمنی نے سپریم کورٹ کو بتایا کہ سبھی نے معافی مانگ لی ہے۔ جسٹس کانت نے تبصرہ کیا- ’’مذاق زندگی کا حصہ ہے اور ہم اپنے اوپر بنے مذاق کو قبول کر سکتے ہیں لیکن جب آپ دوسروں کو مذاق بنانا شروع کرتے ہیں تو یہ حساسیت کی خلاف ورزی ہے۔‘‘

سپریم کورٹ نے سمے رینا، وپل گوئل، بلراج پرمیت سنگھ گھئی، سونالی ٹھکر اور نشانت جگدیش تنور کو بلا شرط معافی شائع کرنے کی ہدایت دی ہے۔ عدالت نے انہیں سوشل میڈیا پلیٹ فارمس، یو ٹیوب چینل پر بھی عوامی طور سے معافی مانگنے کے لیے کہا ہے۔ ساتھ ہی ان سے ایک حلف نامہ داخل کرنے کو کہا ہے جس میں یہ بتایا جائے کہ انہوں نے نادر بیماریوں اور معذوریت کے لیے کیا کام کیا ہے۔ عدالت نے ان سے یہ بھی سوال کیا کہ ان پر کتنا جرمانہ لگایا جانا چاہیے؟