آسام بی جے پی کی متنازعہ اے آئی ویڈیو پر سپریم کورٹ نے جاری کیا نوٹس، مسلمانوں کی شبیہ بگاڑنے کا الزام

مصنوعی ذہانت یعنی اے آئی تکنیک کا استعمال سیاسی پارٹیاں بھی اب زور و شور سے کرنے لگی ہیں۔ بی جے پی کی آسام یونٹ بھی اس معاملے میں پیچھے نہیں ہے، لیکن گزشتہ دنوں اے آئی سے تیار ایک ویڈیو تنازعہ کا شکار ہو گئی ہے۔ اس ویڈیو میں بی جے پی نے مبینہ طور پر مسلمانوں کی شبیہ بگاڑنے کی کوشش کی تھی۔ اب سپریم کورٹ نے اس تعلق سے آسام حکومت، بی جے پی کی آسام یونٹ اور سوشل میڈیا پلیٹ فارم ’ایکس‘ کو نوٹس جاری کیا ہے۔

دراصل آسام بی جے پی کے ذریعہ اے آئی سے تیار متنازعہ ویڈیو کو ہٹانے کے لیے سپریم کورٹ میں ایک عرضی داخل کی گئی تھی۔ اسی پر سماعت کرتے ہوئے عدالت عظمیٰ نے منگل کے روز آسام حکومت، آسام بی جے پی اور ایکس کو نوٹس بھیجا ہے۔ اس ویڈیو میں پارٹی کے انتخاب ہارنے کی صورت میں مبینہ طور پر مسلم بالادستی کو ظاہر کرنے کی کوشش کی گئی تھی۔ ساتھ ہی لوگوں کو خوفزدہ کرنے کی کوشش کے تحت مسلم طبقہ کو غلط طریقے سے پیش کیا گیا تھا۔ ویڈیو میں یہ اندیشہ بھی ظاہر کیا گیا تھا کہ اگر بی جے پی انتخاب ہار جاتی ہے تو ریاست پر مسلمانوں کا قبضہ ہو جائے گا۔ جسٹس وکرم ناتھ اور جسٹس سندیپ مہتا کی بنچ نے ایڈووکیٹ نظام پاشا کی دلیلیں سننے کے بعد یہ نوٹس جاری کیا ہے۔

اس ویڈیو کے وائرہ ہونے کے بعد کئی مسلم تنظیموں کے ساتھ ساتھ سول سوسائٹی کے لوگوں نے اپنی سخت ناراضگی اور اعتراض ظاہر کیا تھا۔ لوگوں نے ہیمنت کمار بسوا حکومت پر الزام عائد کیا تھا کہ وہ ترقی کی جگہ فرقہ وارانہ خیر سگالی کو تباہ کر عوام کا ووٹ لینا چاہتی ہے۔ اسی مقصد سے بی جے پی مسلمانوں کی شبیہ خراب کر رہی ہے۔ اب جبکہ معاملہ سپریم کورٹ میں پہنچ چکا ہے، تو دیکھنے والی بات یہ ہے کہ بی جے پی خود یہ ویڈیو ہٹاتی ہے یا پھر عدالت کے حکم کا انتظار کرے گی۔