ممتا بنرجی کے خلاف ای ڈی کی عرضی، سپریم کورٹ میں سماعت ملتوی

نئی دہلی: آئی پیک چھاپہ ماری معاملے میں وزیر اعلیٰ ممتا بنرجی کے خلاف دائر عرضی پر سپریم کورٹ میں ہونے والی سماعت ملتوی کر دی گئی ہے۔ اب اس معاملے کی اگلی سماعت 18 مارچ کو ہوگی۔ عدالت میں پیشی کے دوران انفورسمنٹ ڈائریکٹوریٹ کی جانب سے پیش سالیسٹر جنرل نے کہا کہ ای ڈی آج ہی اپنا جواب داخل کر دے گی، جس کے بعد آئندہ تاریخ پر تفصیلی دلائل پیش کیے جائیں گے۔

انفورسمنٹ ڈائریکٹوریٹ نے آئی پیک کے دفاتر پر چھاپہ ماری کے دوران مبینہ مداخلت کا الزام عائد کرتے ہوئے سپریم کورٹ سے رجوع کیا ہے۔ عرضی میں ممتا بنرجی، مغربی بنگال کے ڈی جی پی راجیو کمار اور کولکاتا پولیس کمشنر منوج کمار کو فریق بنایا گیا ہے۔ ای ڈی نے عدالت سے درخواست کی ہے کہ ان تینوں کے خلاف ایف آئی آر درج کرنے کی اجازت دی جائے، کیونکہ ان پر جانچ عمل میں رکاوٹ ڈالنے کا الزام ہے۔

دوسری جانب ممتا بنرجی نے عدالت میں داخل اپنے حلف نامے میں ای ڈی کے الزامات کو مسترد کیا ہے۔ انہوں نے مؤقف اختیار کیا کہ کولکاتا میں واقع آئی پیک کے دفاتر میں تلاشی کے نام پر ای ڈی کے افسران نے ترنمول کانگریس سے وابستہ حساس اور انتخابی حکمت عملی سے متعلق خفیہ ڈیٹا ضبط کر لیا۔ ان کے مطابق یہ کارروائی نہ صرف غیر قانونی تھی بلکہ جمہوری عمل میں مداخلت کے مترادف بھی ہے۔

ممتا بنرجی نے اپنے بیان میں کہا کہ جیسے ہی انہیں اطلاع ملی کہ آئی پیک کے دفاتر میں چھاپہ ماری جاری ہے اور وہاں پارٹی کا حساس مواد موجود ہے، وہ خود موقع پر پہنچیں۔ ان کا کہنا ہے کہ ان کا مقصد صرف پارٹی کی خفیہ دستاویزات کو محفوظ رکھنا تھا تاکہ کسی بھی ممکنہ غلط استعمال سے بچایا جا سکے۔ انہوں نے واضح کیا کہ انہوں نے ای ڈی کی کارروائی میں کسی قسم کی رکاوٹ نہیں ڈالی۔

اب اس معاملے میں تمام فریقین کے دلائل 18 مارچ کو ہونے والی اگلی سماعت میں سنے جائیں گے۔ اس مقدمے کو جانچ ایجنسیوں کے اختیارات اور ریاستی حکومت کے دائرہ کار کے حوالے سے اہم تصور کیا جا رہا ہے، جس پر قانونی اور سیاسی حلقوں کی نظریں مرکوز ہیں۔