سماجوادی پارٹی کے رکن پارلیمنٹ ضیاء الرحمٰن برق پر بجلی چوری کا الزام، 1.91 کروڑ روپے کا جرمانہ عائد

لکھنؤ: اتر پردیش کے سنبھل سے سماج وادی پارٹی کے رکن پارلیمنٹ ضیاء الرحمان برق پر بجلی محکمہ نے ایک کروڑ 91 لاکھ روپے کا جرمانہ عائد کیا ہے۔ رکن پارلیمنٹ پر بجلی چوری کا الزام لگایا گیا ہے اور ان کے خلاف ایف آئی آر درج کی گئی ہے۔ اس کے علاوہ ان کے گھر کی بجلی بھی کاٹ دی گئی ہے۔

بجلی محکمہ نے بتایا کہ رکن پارلیمنٹ کے گھر میں زیرو میٹر ریڈنگ سامنے آنے کے بعد یہ کارروائی کی گئی۔ محکمہ کی طرف سے ضیاء الرحمان برق کو نوٹس جاری کیا جائے گا، اور جرمانہ ادا نہ کرنے کی صورت میں آر سی جاری کی جائے گی۔ اس بات کی تصدیق ایس ڈی او سنتوش تریپاٹھی نے کی ہے۔

جمعرات کی صبح بجلی محکمہ کی ٹیم بھاری پولیس فورس کے ساتھ ضیاء الرحمان برق کے گھر پہنچی۔ یہ کارروائی بجلی کی چیکنگ اور اسمارٹ میٹر کی ریڈنگ کی جانچ کے لیے کی گئی۔ گھر کے دو بجلی میٹروں میں ٹیمپرنگ کے ثبوت ملنے کا دعویٰ کیا گیا۔ چند روز قبل پرانے میٹرز کو ہٹا کر سیل کر دیا گیا تھا اور جانچ کے لیے لیبارٹری بھیجا گیا تھا۔ ان میٹرز کی رپورٹ سے یہ واضح ہوا کہ بجلی غیر قانونی طریقے سے استعمال کی جا رہی تھی۔

محکمہ نے ضیاء الرحمان برق پر بجلی چوری کا مقدمہ درج کر لیا ہے اور ان کے ساتھیوں پر محکمہ کے افسران کو دھمکانے کا بھی الزام لگایا ہے۔ ان کے والد مملوک الرحمان برق کے خلاف بھی سرکاری کام میں رکاوٹ ڈالنے اور افسران کو دھمکی دینے کا مقدمہ درج کیا گیا ہے۔

محکمہ کے ایک افسر کی شکایت پر درج ایف آئی آر میں بتایا گیا ہے کہ لیبارٹری سے حاصل شدہ رپورٹ کے مطابق میٹر کو بائی پاس کر کے غیر قانونی طور پر بجلی استعمال کی جا رہی تھی۔

ضیاء الرحمان برق کے خلاف بجلی ایکٹ 2003 کی دفعہ 135 کے تحت مقدمہ درج کیا گیا ہے۔ اس دوران، پولیس نے یہ بھی بتایا کہ ان کے والد نے معائنہ کے دوران افسران کو گالی دی اور حکومت بدلنے پر دیکھ لینے کی دھمکی دی۔ پولیس کا کہنا ہے کہ بجلی محکمہ کے افسران نے اس واقعے کی ویڈیو بھی ریکارڈ کر لی ہے۔ بجلی محکمہ کے مطابق، یہ کارروائی عوامی وسائل کے تحفظ کے لیے کی گئی ہے اور معاملے کی مکمل تحقیقات جاری ہیں۔