مہاراشٹر میں دکان، ریستوراں، ہوٹل اور تھیٹر کو ملی 24 گھنٹے کھولنے کی اجازت، شراب کی دکانوں پر نافذ ہوگا قبل والا اصول

مہاراشٹر حکومت نے رہائشی ہوٹلوں، ریستورانوں، کھانے پینے کے مراکز، تھیٹرس، عوامی تفریح گاہوں سمیت دکانوں و کاروباری اداروں کو پوری ریاست میں 24 گھنٹے کھلا رکھنے کی اجازت دے دی ہے۔ تاہم شراب کی دکانیں اور بیئر بار 24 گھنٹے نہیں کھلیں گی اور ان پر قبل والے ہی ضابطے نافذ رہیں گے۔ اس تعلق سے یکم اکتوبر کو ایک سرکاری حکم (جی آر) جاری کر دیا گیا ہے۔

سرکاری حکم میں واضح طور پر کہا گیا ہے کہ رہائشی ہوٹل، ریستوراں، کھانے پینے کے مراکز، تھیٹر، عوامی تفریح گاہیں، دکانیں اور کاروباری ادارے پوری ریاست میں 24 گھنٹے کھلے رہ سکتے ہیں۔ لیکن شراب کی فروخت اور سپلائی سے متعلق اداروں کو 24 گھنٹے کھلنے کی اجازت نہیں ملے گی۔ ان میں وائن شاپ، بیئر بار، ڈانس بار، حقہ پارلر، ڈسکوتھیك اور پرمٹ روم شامل ہیں۔

سرکاری حکم میں یہ بھی کہا گیا ہے کہ دکانیں اور کاروباری ادارے ہفتہ کے تمام دن کھلے رہ سکتے ہیں، بشرطیکہ ہر ملازم کو ہفتہ میں کم از کم 24 گھنٹے کا مسلسل آرام دیا جائے۔ مذکورہ اداروں کے کام کے اوقات محدود ہی رہیں گے۔ اس سے قبل 19 دسمبر 2017 کو جاری نوٹیفکیشن میں ریاستی حکومت نے پرمٹ روم، بیئر بار، ڈانس بار، حقہ پارلر، ڈسکوتھیك اور شراب فروخت کرنے والے تمام اداروں کے ساتھ ساتھ وائن شاپ، تھیٹر اور سنیما ہال کے کھلنے اور بند ہونے کا وقت مقرر کر دیا تھا۔

اس کے بعد 31 جنوری 2020 کے نوٹیفکیشن میں حکومت نے تھیٹر اور سنیما ہال کو پچھلے نوٹیفکیشن سے باہر کر دیا اور صرف شراب بیچنے یا پیش کرنے والے اداروں کو وقت کی پابندی میں رکھا۔ سرکاری حکم (جی آر) میں یہ بھی کہا گیا کہ مقامی انتظامیہ اور پولیس محکمہ ان احکامات پر سختی سے عمل درآمد کرائیں۔