شرد پوار کی طبیعت پھر خراب، جسم میں پانی کی کمی کی شکایت کے بعد اسپتال میں بھرتی

مہاراشٹر کے سابق وزیراعلیٰ اور این سی پی (ایس پی) کے سربراہ شرد پوار کی طبیعت ایک بار پھر خراب ہوگئی ہے۔ انہیں پونے کے روبی ہال کلینک میں داخل کرایا گیا ہے۔ خبروں کے مطابق اتوار کے روز صبح شرد پوار کی طبیعت اچانک بگڑ گئی جس کے بعد انہیں اسپتال لے جایا گیا۔ ان کی بیٹی اور ایم پی سپریہ سولے فی الحال ان کے ساتھ ہیں۔ انہوں نے سوشل میڈیا پر پوسٹ کرکے اطلاع دی۔

سپریا سولے نے سوشل میڈیا پراپنی پوسٹ میں کہا کہ میں اس وقت بابا کے ساتھ ہوں، ان کے کچھ ٹیسٹ ہونے ہیں۔ وہ تھوڑی کمزوری محسوس کر رہے ہیں اور پانی کی کمی کا شکار بھی پائے گئے ہیں۔ ڈاکٹروں کے مطابق 85 سالہ شرد پوار کو ہلکا ڈی ہائیڈریشن (جسم میں پانی کی کمی) ہوگیا تھا جس کی وجہ سے انہیں اسپتال میں داخل کرایا گیا۔ فی الحال ان کی حالت مستحکم ہے اور انہیں ڈرپ کے ذریعے مائعات دیئے جارہے ہیں۔

بتایا جارہا ہے پچھلے کچھ عرصہ سے ان کی طبیعت ٹھیک نہیں چل رہی ہے۔ بھتیجے اجیت پوار کی طیارہ حادثے میں موت کے بعد سے ان کی طبیعت زیادہ خراب ہونے لگی۔ سینے میں کف کی شکایت کے بعد ملک کے بزرگ سیاستداں کو بارامتی سے پونے لے جایا گیا تھا۔ اس دوران ڈاکٹروں کی ٹیم ان کے گھر بھی آئی تھی۔ اب ایک بار پھر انہیں اسپتال میں بھرتی کرایا گیا ہے۔ ان کی حالت فی الحال مستحکم ہے حالانکہ کچھ ضروری طبی ٹیسٹ کیے جائیں گے۔

روبی ہال کلینک کے ڈاکٹروں نے بتایا کہ شرد پوار کو اسپتال میں تقریباً دو دن تک زیر نگرانی رکھا جائے گا اور اس کے بعد انہیں چھٹی ملنے کی امید ہے۔ ان کے علاج کی نگرانی اسپتال کے سینئر ڈاکٹر کررہے ہیں۔ اس سے پہلے بھی 9 فروری کو سینے میں انفیکشن کی وجہ سے اسی اسپتال میں داخل کرایا گیا تھا اور 14 فروری کو ڈسچارج کر دیا گیا تھا۔