شمالی ہند میں شدید گرمی کی لہر کا خدشہ، درجۂ حرارت 45 ڈگری کے قریب پہنچنے کے آثار

نئی دہلی: محکمۂ موسمیات نے خبردار کیا ہے کہ دہلی، این سی آر اور شمالی ہند کے کئی علاقوں میں آئندہ چند دنوں کے دوران شدید گرمی اور لو کی صورتحال پیدا ہو سکتی ہے۔ محکمہ کے مطابق شمال مغربی اور وسطی ہند کے میدانی علاقوں میں درجۂ حرارت میں مسلسل اضافہ ہونے کا امکان ہے اور کئی مقامات پر پارہ 45 ڈگری سیلسیس کے قریب پہنچ سکتا ہے۔

محکمۂ موسمیات کے تازہ اندازوں کے مطابق اگلے ہفتے کے دوران شمال مغربی ہند میں زیادہ سے زیادہ درجۂ حرارت میں 3 سے 5 ڈگری سیلسیس تک اضافہ ہو سکتا ہے۔ 21 مئی تک درجۂ حرارت میں بتدریج اضافہ جاری رہنے کا امکان ہے، جبکہ 22 اور 23 مئی کے دوران موسم میں کسی بڑی تبدیلی کی توقع نہیں کی جا رہی۔

دہلی اور اس سے ملحق علاقوں میں گرمی کی شدت پہلے ہی محسوس کی جانے لگی ہے۔ صفدر جنگ میں ہفتے کے روز زیادہ سے زیادہ درجۂ حرارت 40 ڈگری سیلسیس درج کیا گیا، جو معمول سے کچھ زیادہ رہا۔ محکمۂ موسمیات کا کہنا ہے کہ آئندہ دنوں میں دہلی، پنجاب، ہریانہ اور چندی گڑھ کے کئی حصوں میں شدید لو چل سکتی ہے۔

راجستھان میں 17 سے 23 مئی تک شدید گرمی اور لو کی صورتحال برقرار رہنے کا امکان ظاہر کیا گیا ہے۔ اسی طرح پنجاب، ہریانہ، چندی گڑھ اور دہلی میں 18 سے 23 مئی کے درمیان گرمی میں مزید اضافہ ہو سکتا ہے۔ مدھیہ پردیش اور چھتیس گڑھ میں بھی 17 سے 21 مئی تک لو چلنے کی پیش گوئی کی گئی ہے۔

محکمۂ موسمیات کے مطابق اتر پردیش کے کئی علاقوں میں بھی درمیانی سے شدید لو چلنے کا خدشہ ہے، جبکہ جنوبی ہند میں تلنگانہ کے بعض حصے شدید گرمی کی لپیٹ میں رہ سکتے ہیں۔ ماہرین نے خاص طور پر بچوں، بزرگوں اور بیمار افراد کو دوپہر کے وقت غیر ضروری طور پر باہر نکلنے سے گریز کرنے کا مشورہ دیا ہے۔

ادھر کچھ علاقوں میں موسم بدلنے کے آثار بھی ظاہر کیے گئے ہیں۔ محکمۂ موسمیات نے 17 اور 18 مئی کو مدھیہ پردیش، ودربھ اور مغربی ہند کے بعض حصوں میں تیز ہواؤں، گرج چمک اور اولہ باری کے ساتھ درمیانی بارش کی پیش گوئی کی ہے۔ شمال مشرقی ہند کی کئی ریاستوں، جن میں آسام، میگھالیہ، ناگالینڈ، منی پور، میزورم اور تریپورہ شامل ہیں، میں 18 مئی کو گرج چمک کے ساتھ بارش ہونے کا امکان ہے۔ اروناچل پردیش میں اسی دوران بعض مقامات پر شدید بارش کی وارننگ بھی جاری کی گئی ہے۔