نینی تال، شملہ، چنڈی گڑھ، غازی آباد اور گوتم بدھ نگر میں شدید بارش کی وجہ سے تمام اسکول بند رکھنے کا فیصلہ

شمالی ہندوستان میں طوفانی بارشوں نے نظام زندگی درہم برہم کر دیا ہے۔ محکمہ موسمیات(آئی ایم ڈی)کی جانب سے جاری کردہ وارننگ کے پیش نظر انتظامیہ نے نینی تال، شملہ، چنڈی گڑھ، غازی آباد اور گوتم بدھ نگر میں 3 ستمبر کو تمام سرکاری اور نجی اسکولوں کو بند کرنے کا حکم جاری کیا ہے۔

دہلی-این سی آر میں مسلسل بارش کی وجہ سے سڑکوں پر پانی جمع ہونے اور ٹریفک نظام درہم برہم ہونے کی وجہ سے انتظامیہ نے لوگوں سے گھروں کے اندر رہنے کی اپیل کی ہے۔ گروگرام میں بھاری سے بہت زیادہ بارش کے اورنج الرٹ کے باوجود،  خبروں کے مطابق ضلع انتظامیہ نے اسکولوں کے حوالے سے کوئی ایڈوائزری جاری نہیں کی ہے۔

اتراکھنڈ کے نینی تال ضلع میں مسلسل بارش اور لینڈ سلائیڈنگ کے خطرے کے پیش نظر ضلع انتظامیہ نے 3 ستمبر کو تمام تعلیمی ادارے بند رکھنے کا فیصلہ کیا ہے۔ہماچل پردیش کے شملہ میں بھی موسلادھار بارش سے سڑکوں پر پانی جمع ہونے اور لینڈ سلائیڈنگ کے واقعات میں اضافہ ہوا ہے۔ اس کی وجہ سے 3 ستمبر کو تمام اسکول، کالج، آنگن واڑی مراکز اور دیگر تعلیمی ادارے بند رہیں گے۔

چنڈی گڑھ انتظامیہ نے خراب موسم کے پیش نظر 3 ستمبر کو تمام اسکول بند رکھنے کا فیصلہ کیا ہے۔ موسلا دھار بارش سے شہر میں پانی جمع ہونے اور سڑکوں پر جام کی پریشانی بڑھ گئی ہے۔ انتظامیہ نے شہریوں سے کہا ہے کہ وہ محتاط رہیں اور غیر ضروری سفر سے گریز کریں۔

مقامی انتظامیہ نے لوگوں سے اپیل کی ہے کہ وہ دریاؤں اور نالوں کے قریب نہ جائیں، پرانے اور خستہ حال ڈھانچوں سے دور رہیں اور موسم کی تازہ کاریوں پر نظر رکھیں۔ محکمہ موسمیات نے اگلے 24 گھنٹوں میں شمالی ہندوستان کے کئی حصوں میں شدید بارش کی وارننگ دی ہے، جس کی وجہ سے تمام متعلقہ محکموں کو ہائی الرٹ پر رکھا گیا ہے۔