’حقِ اطلاعات کمزور ہوگا تو جمہوریت بھی کمزور ہوگی‘، انل بھاردواج کا آر ٹی آئی قانون کو پھر مضبوط بنانے کا مطالبہ

نئی دہلی: دہلی پردیش کانگریس کے شعبہ مواصلات کے چیئرمین اور سابق رکن اسمبلی انل بھاردواج نے کہا ہے کہ حق اطلاعات (آر ٹی آئی) قانون ہندوستان کے جمہوری ڈھانچے کی بنیادوں میں سے ایک ہے، جس کی کمزوری دراصل جمہوریت کی کمزوری ہے۔ انہوں نے بھارتیہ جنتا پارٹی کی مرکزی حکومت سے مطالبہ کیا کہ وہ اس قانون کو دوبارہ شفاف اور مؤثر بنائے تاکہ عوامی اداروں کی جوابدہی یقینی بن سکے۔

انہوں نے کہا کہ آر ٹی آئی ایکٹ کو ڈاکٹر منموہن سنگھ کی قیادت میں یو پی اے حکومت نے 12 اکتوبر 2005 کو نافذ کیا تھا، جس کا مقصد حکومت اور عوامی اداروں کو شفاف بنانا تھا۔ مگر 2014 کے بعد سے مودی حکومت اس قانون کو مسلسل کمزور کر رہی ہے۔ انہوں نے کہا کہ 2019 میں حکومت نے ترمیمات کے ذریعے آر ٹی آئی کمیشن کی خودمختاری ختم کر دی اور مرکزی حکومت کو یہ اختیار دے دیا کہ وہ کمشنروں کی مدت کار اور سروس کی شرائط خود طے کرے۔

انل بھاردواج نے کہا کہ 2023 میں لائے گئے ڈیجیٹل پرسنل ڈیٹا پروٹیکشن ایکٹ کے تحت آر ٹی آئی کی ایک اہم شق میں ترمیم کی گئی، جس کے بعد حکومت کسی بھی عوامی مفاد سے متعلق معلومات کو ’ذاتی‘ قرار دے کر اس کے انکشاف سے انکار کر سکتی ہے۔ اس کے نتیجے میں ووٹر فہرستوں، انتخابی اخراجات اور دیگر اہم عوامی معلومات عام شہریوں کی دسترس سے باہر ہو گئی ہیں۔

انہوں نے کہا کہ مرکزی اور ریاستی انفارمیشن کمیشنوں میں خالی عہدوں کی وجہ سے لاکھوں اپیلیں زیرِ التواء ہیں۔ صرف مرکزی کمیشن میں ہی نومبر 2024 تک تقریباً 23 ہزار مقدمات باقی ہیں، جبکہ پورے ملک میں 4 لاکھ سے زیادہ درخواستیں زیر غور ہیں۔ انہوں نے کہا کہ سپریم کورٹ نے حکومت کو شفاف طریقے سے تقرریاں مکمل کرنے کا حکم دیا تھا، مگر حکومت نے کوئی کارروائی نہیں کی۔

انل بھاردواج نے کہا کہ یو پی اے حکومت نے وہسل بلوور پروٹیکشن ایکٹ بھی منظور کیا تھا، مگر مودی حکومت نے نہ اسے نافذ کیا اور نہ ہی اس کے ضابطے بنائے۔ انہوں نے مطالبہ کیا کہ 2019 کی ترمیمات کو ختم کر کے آر ٹی آئی کمیشن کی خودمختاری بحال کی جائے، کمشنروں کے لیے پانچ سالہ مدت اور محفوظ سروس شرائط یقینی بنائی جائیں، اور وہسل بلوور قانون کو فوری طور پر نافذ کیا جائے۔

انہوں نے کہا کہ آر ٹی آئی ایک ایسا آلہ ہے جس نے عام شہری کو حکومت سے سوال کرنے کا حق دیا۔ اگر یہ کمزور ہوا تو جمہوریت کی بنیادیں بھی ہل جائیں گی۔ کانگریس پارٹی اس قانون کی 20ویں سالگرہ پر اس کے تحفظ اور مضبوطی کے عزم کو دہراتی ہے تاکہ ہر شہری بغیر خوف کے سوال اٹھا سکے۔

انل بھاردواج نے کہا کہ جس طرح عام آدمی پارٹی نے جن لوک پال کے نام پر عوام کو گمراہ کیا، ویسے ہی بی جے پی حکومت نے بھی لوک پال کے معاملے پر خاموشی اختیار کر رکھی ہے۔