ریزرو بینک آف انڈیا نے کوٹک مہندرا بینک پر عائد سبھی پابندیوں کو ہٹایا، نئے کریڈٹ کارڈ بھی ہو سکیں گے جاری

آر بی آئی (ریزرو بینک آف انڈیا) نے کوٹک مہندرا بینک کو بڑی راحت دیتے ہوئے اس پر عائد سبھی پابندیوں کو ہٹا دیا ہے۔ تعمیل کی خامیاں ظاہر ہونے کے بعد مرکزی بینک نے کوٹک مہندرا بینک کو نئے صارفین جوڑنے سے روک دیا تھا اور بینک کے ذریعہ نئے کریڈٹ کارڈ جاری کرنے پر بھی پابندی عائد کر دی تھی۔ اب یہ پابندیاں ختم ہو گئی ہیں، جس کے بعد نئے کریڈٹ کارڈ بھی جاری ہو سکیں گے۔ آر بی آئی کے اس فیصلے کے بعد کوٹک مہندرا بینک نے شکریہ بھی ادا کیا ہے۔

ریزرو بینک آف انڈیا نے اپنے تازہ بیان میں کہا ہے کہ کوٹک مہندرا بینک نے اپنی خامیوں کو ٹھیک کرنے کے لیے ضروری اقدام کیے ہیں اور سبھی اصولوں پر بھی عمل کیا ہے۔ آر بی آئی کی طرف سے کہا گیا ہے کہ بینک نے اپنی خامیوں کو دور کرنے کے لیے جو قدم اٹھائے ہیں، اس کے لیے ایک باہری آڈٹ بھی کرایا گیا تاکہ ان اصلاحات کی تصدیق کی جا سکے۔

قابل ذکر ہے کہ آر بی آئی نے کوٹک مہندرا بینک پر گزشتہ سال 24 اپریل کو کئی طرح کی پابندیاں عائد کر دی تھیں۔ ان پابندیوں کے تحت مرکزی بینک نے مہندرا بینک کو اپنے آن لائن اور موبائل بینکنگ چینلوں کے ذریعہ نئے صارفین کو جوڑنے اور نئے کریڈٹ کارڈ جاری کرنے سے فوری روک لگا دی تھی۔ 12 فروری 2025 کو یہ سبھی پابندیاں ہٹا دی گئی ہیں اور کوٹک مہندرا بینک حسب سابق اپنا کام کر سکتا ہے۔

واضح رہے کہ آر بی آئی نے جب اپریل 2024 میں کوٹک مہندرا بینک پر پابندیاں عائد کی تھیں، تو اس بینک کا شیئر تیزی کے ساتھ ٹوٹا تھا اور بینک کے مارکیٹ کیپ میں بھی زبردست گراوٹ آئی تھی۔ اب جبکہ پابندیاں ہٹا لی گئی ہیں تو آج اس بینکنگ اسٹاک پر مثبت اثر دیکھنے کو مل سکتا ہے۔ 12 فروری کی بات کریں تو شیئر مارکیٹ میں گراوٹ کے باوجود کوٹک بینک کا شیئر 1.40 فیصد کی تیزی کے ساتھ 1945.50 روپے پر بند ہوا تھا۔