مغربی بنگال میں 15 پولنگ مراکز پر 2 مئی کو دوبارہ ووٹنگ، الیکشن کمیشن کا حکم

کولکاتا: مغربی بنگال اسمبلی انتخابات 2026 کے تحت الیکشن کمیشن نے جنوبی 24 پرگنہ ضلع کی دو اسمبلی نشستوں کے 15 پولنگ مراکز پر 2 مئی کو دوبارہ ووٹنگ کرانے کا حکم جاری کیا ہے۔ کمیشن نے 29 اپریل کو ان مراکز پر ہونے والی پولنگ کو منسوخ قرار دیتے ہوئے یہ قدم اٹھایا ہے، جس کے بعد متعلقہ علاقوں میں انتخابی سرگرمیاں ایک بار پھر تیز ہوگئی ہیں۔

الیکشن کمیشن کی جانب سے مغربی بنگال کے چیف الیکٹورل آفیسر کو بھیجے گئے باضابطہ مکتوب میں کہا گیا ہے کہ یہ فیصلہ متعلقہ ریٹرننگ افسران اور مبصرین کی رپورٹوں کی بنیاد پر کیا گیا ہے۔ کمیشن کے مطابق 142-مگرہات مغرب اور 143-ڈائمنڈ ہاربر اسمبلی حلقوں میں کچھ پولنگ مراکز پر ووٹنگ کے عمل میں ایسی بے ضابطگیاں سامنے آئیں، جن کی وجہ سے آزادانہ اور منصفانہ انتخابات کے اصول متاثر ہوئے۔ اسی بنیاد پر عوامی نمائندگی ایکٹ 1951 کی دفعہ 58(2) کے تحت ان مراکز کی پولنگ کو کالعدم قرار دیا گیا۔

کمیشن کے حکم کے مطابق 2 مئی 2026 کو ان تمام 15 پولنگ مراکز پر صبح 7 بجے سے شام 6 بجے تک دوبارہ ووٹنگ ہوگی۔ انتظامیہ کو ہدایت دی گئی ہے کہ وہ سیکیورٹی کے مناسب انتظامات کو یقینی بنائے اور ووٹنگ کے عمل کو شفاف بنانے کے لیے تمام ضروری اقدامات کرے۔

142-مگرہات مغرب اسمبلی حلقے کے 11 پولنگ مراکز پر دوبارہ ووٹنگ ہوگی، جن میں اتر یرپور ایف پی اسکول (کمرہ نمبر 2)، ناجرا ایف پی اسکول (کمرہ نمبر 1 اور 2)، دیولا ایف پی اسکول (کمرہ نمبر 1)، گھولا نویاپار گرلس ہائی مدرسہ (کمرہ نمبر 2)، ایکتارا ملیا ایف پی اسکول (کمرہ نمبر 1 اور 2)، ایکتارا ملیا دھورا ایف پی اسکول (کمرہ نمبر 1) اور باہرپُویا کرکُریا ایف پی اسکول (کمرہ نمبر 1، 2 اور 3) شامل ہیں۔

اسی طرح 143-ڈائمنڈ ہاربر اسمبلی حلقے کے چار پولنگ مراکز پر بھی دوبارہ ووٹنگ ہوگی، جن میں بگدا جونیئر ہائی اسکول، چندا ایف پی اسکول (کمرہ نمبر 2)، ہری دیوپور ایف پی اسکول اور رائن نگر ایف پی اسکول (کمرہ نمبر 2) شامل ہیں۔

الیکشن کمیشن نے مقامی انتظامیہ کو ہدایت دی ہے کہ وہ ان علاقوں میں دوبارہ ووٹنگ کی اطلاع وسیع پیمانے پر عام کرے، تاکہ ووٹرز کو بروقت معلومات مل سکیں۔ ساتھ ہی تمام امیدواروں کو بھی تحریری طور پر اس فیصلے سے آگاہ کرنے کو کہا گیا ہے، تاکہ انتخابی عمل میں شفافیت برقرار رہے۔

واضح رہے کہ ان نشستوں پر 29 اپریل کو ووٹنگ ہوئی تھی، تاہم بعد میں موصول ہونے والی رپورٹوں میں بے ضابطگیوں کی نشاندہی کی گئی، جس کے بعد کمیشن نے سخت قدم اٹھاتے ہوئے دوبارہ ووٹنگ کا فیصلہ کیا۔ مغربی بنگال اسمبلی انتخابات کے نتائج 4 مئی کو متوقع ہیں، جس کے لیے ریاست بھر میں تیاریاں مکمل کر لی گئی ہیں اور سیاسی سرگرمیاں عروج پر ہیں۔