جن آکروش ریلی LIVE:  مودی اقتدار کے پیچھے چھپ جاتے ہیں، راہل

راہل گاندھی نے کہا ’’کانگریس کارکارکن شیر کا بچہ ہے، اس کو مارو پیٹو، مگر یہ ڈرنے والا نہیں۔ پنجاب میں پوچھو بینت سنگھ کون تھے، کس کے لئے مرے۔ آسام میں کتنے کانگریس کارکنان نے اپنی جایں دے دیں۔ کانگریس کارکنان نے اقتدار کے لئے نہیں بلکہ سچائی کے لئے اپنی جانیں دیں۔ ‘‘

راہل گاندھی نے کہا ’’آپ نے دیکھا ہوگا کہ مودی جی کا چہرہ بدل گیا ہے۔ ہم سچ کے ساتھ کھڑے رہتے ہیں اور مودی جی اقتدار کے پیچھے چھپے رہتے ہیں۔ کانگریس میں 18 سال سے لے کر 80 سال تک کے لوگوں کو عزت ملے گی، اور اگر کوئی عزت نہیں دے گا میں اس پر کارروائی کروں گا۔‘‘

راہل گاندھی نے کہا ’’ہماری پارٹی میں لیڈرشپ کی کمی نہیں ہے۔ پارٹی میں الگ-الگ رائے ہو سکتی ہیں۔ سلمان خورشید جی یہاں بیٹھے ہیں۔ کچھ دنوں پہلے انہوں نے الگ رائے دی تھی، میں الگ رائے دینے والے خورشید جی کی حفاظت کروں گا۔ لیکن میں ان سے کہنا چاہوں گا کہ جب ہم آرایس ایس اور بی جے پی کے خلاف لڑ رہے ہیں تو ہمیں متحد ہو کر ایک ساتھ لڑنا چاہئے۔‘‘

جن آکروش ریلی سے خطاب کرتے ہوئے راہل گاندھی نے کہا کہ ہندوستان مندروں، مسجدوں اور گرودواروں کا ملک ہے۔ ملک کے عوام صرف اور صرف سچائی کے سامنے سر جھکاتے ہیں۔

راہل گاندھی نے کہا کہ ’’کرناٹک میں چناوی ریلی میں مودی جی کہتے ہیں کہ میں بدعنوانی کے خلاف لڑائی لڑ رہا ہوں اور ان کے دائیں بائیں بدعنوان وزراء کھڑے رہتے ہیں، یدی یورپا کھڑے رہتے ہیں۔ عوام حیران رہ جاتی ہے کہ وہ کیسی لڑائی لڑ رہے ہیں۔‘‘ انہوں نے کہا ’’میں جب لوگوں سے پوچھتا ہوں کہ خوش ہو تو جواب ملتا ہے، نہیں۔‘‘

راہل گاندھی نے کہا کہ ’’نیرو مودی، پیوش گوئل اور جے شاہ کے خلاف مودی ایک لفظ نہیں بولتے۔ امت شاہ کا بیٹے 50 ہزار کو چند سالوں میں کروڑوں میں بدل لیتے ہیں لیکن مودی کچھ نہیں کہتے۔‘‘

راہل گاندھی نے کہا ’’70 سالوں میں پہلی بار سپریم کورٹ کے جج عوام کے سامنے آتے ہیں اور کہتے ہیں کہ ملک کے عوام سے ہم انصاف مانگ رہے ہیں، لیکن مودی جی، خاموش۔‘‘

راہل گاندھی نے کہا ’’پہلی بار جب بیرون ملک ہندوستان کے وزیر اعظم نریندر مودی پہنچے تو ان کی مخالفت یہ کہہ کر ہوئی کہ آپ ہندوستانی خواتین کی حفاظت نہیں کر سکتے۔ اترپردیش میں ایک خاتون کو نشانہ بنایا گیا۔ جموں و کشمیر میں ایک چھوٹی بچی کے ساتھ عصمت دری کی گئی لیکن مودی ان کی حفاظت نہیں کرسکے۔‘‘

کانگریس صدر نے کہا ’’مودی جی نے کہا تھا کہ کانگریس نے 70 سالوں میں کچھ نہیں کیا مجھے 60 مہینے دو میں ملک بدل کر رکھ دوں گا۔ لیکن 60 مہینوں میں مودی نے ملک کو کیا دیا! گبر سنگھ ٹیکس (جی ایس ٹی) دیا، چھوٹے دکانداروں کو ختم کیا، چین کے سامنے کھڑے نہیں ہو پائے۔‘‘

راہل گاندھی نے کہا کہ ’’یہ ملک ایک عمارت ہے اور کانگریس اس عمارت کا پانی ہے۔ جس طرح پانی کے بغیر کوئی عمارت کھڑی نہیں ہو سکتی، اسی طرح کانگریس کے بغیر یہ ملک کھڑا نہیں ہو سکتا۔‘‘

انہوں نے کہا ’’کسانوں کے سامنے بڑے مسائل ہیں لیکن ان کا ایک روپے کا قرض معاف نہیں ہو رہا۔ میں مودی کے پاس کسانوں کا قرض معاف کروانے کے لئے گیا لیکن ان کے منہ سے ایک لفظ نہیں نکلا۔‘‘

’’مودی جی نے جھوٹ پھیلایا لیکن اب سچ باہر آ رہا ہے۔ آج کانگریس کارکنان کی طاقت لوگوں کو نظر آرہی ہے، گجرات میں کانگریس کے کارکنان کھڑے ہوئے ہیں۔ میڈیا کے ہمارے دوستوں نے کہا کہ گجرات میں کانگریس کو 25 سیٹ سے زیادہ نہیں مل سکتیں۔ گجرات حکومت کے خلاف کانگریس کے کارکنان کھڑے ہو گئے تو مودی گجرات سے نکل گئے۔ کرناٹک، مدھیہ پردیش، راجستھان، چھتیس گڑھ میں کانگریس پارٹی کی جیت ہوگی۔‘‘

راہل گاندھی کا خطاب دیکھیں لائیو

ضلع کانگریس کمیٹی الور، راجستھان سے اقلیتی شعبہ کے ضلع صدر جمشید خان کی قیادت میں سینکڑوں کانگریس کارکنان روانہ ہوئے اور دہلی کے رام لیلا میدان میں منعقدہ جن آکروش ریلی میں شرکت کی۔

جن آکروش ریلی سے خطاب کرتے ہوئے سابق وزیر اعظم منموہن سنگھ نے کہا کہ مودی نے عوام سے جو وعدے کئے تھے وہ پورے نہیں کئے۔ انہوں نے کہا کہ یہ حکومت کسان مخالف ہے۔

کانگریس کی سابق صدر اور یو پی اے کی چیئرپرسن سونیا گاندھی نے جن آکروش ریلی سے خطاب کیا۔ انہوں نے مودی حکومت پر حملہ کرتے ہوئے کہا کہ مودی حکومت کی پالیسیوں نے ملک کی معیشت کو تباہ کر دیا ہے۔

انہوں نے کہا ’’مودی حکومت نے ملک کے عوام کو دھوکہ دیا ہے اور کوئی بھی وعدہ پورا نہیں کیا۔ مودی جی کہتے تھے نا کھاؤں گا، نا کھانے دوں گا لیکن آج جم کر بد عنوانی ہو رہی ہے اور وہ خاموش بیٹھے ہیں۔‘‘ سونیا گاندھی نے مزید کہا کہ ملک میں بچیاں محفوظ نہیں ہیں اور مجرموں کو تحفظ فراہم کیا جا رہا ہے۔ انہوں نے کہا ’’کیا ایسے ہی ملک کے لئے ہمارے قائدین نے اپنا سب کچھ قربان کر دیا تھا! ملک میں میڈیا کو بولنے کی آزادی نہیں، میڈیا کو دبایا جا رہا ہے۔‘‘ سونیا گاندھی نے کہا ’’راہل گاندھی کی قیادت میں ہم سب مل کر سمت سے بھٹکی اور لوگوں سے جھوٹے وعدے کرنے والی حکومت کا مقابلہ کریں گے۔‘‘

سونیا گاندھی نے کہا ’’ملک کے عوام مہنگائی سے پریشان ہیں، تیل کے داموں میں مسلسل اضافہ ہو رہا ہے۔ عوام پریشان حال ہیں اور یہ حکومت کچھ نہیں کر رہی۔‘‘

قومی راجدھانی دہلی میں کانگریس کی ’جن آکروش ریلی‘ ہو رہی ہے۔ راہل گاندھی اور سابق وزیر اعظم منموہن سنگھ ریلی میں پہنچ چکے ہیں۔ کچھ دیرمیں راہل گاندھی ریلی سے خطاب کریں گے۔

اس ریلی میں شامل ہونے کے لئے ملک بھر سے بھاری تعداد میں کانگریس کارکنان دہلی پہنچے ہیں۔ رام لیلا میدان میں منعقدہ اس ریلی کے ذریعے کانگریس کے صدر راہل گاندھی مودی حکومت کی ناکامیوں کو شمار کرائیں گے اور 2019 کے عام انتخابات کے لئے بگل پھونکیں گے۔ کانگریس صدر کا عہدہ سنبھالنے کے بعد دہلی میں یہ راہل گاندھی کی پہلی ریلی ہے۔

جن آکروش ریلی میں موجود کانگریس کے ترجمان رندیپ سرجے والا نے کہا کہ مودی اور امت شاہ جانے والے ہیں اور کانگریس آنے والی ہے۔ انہوں نے کہا ’’ہم اس جن آکروش ریلی کے ذریعے یہ بتانا چاہتے ہیں کہ ہم بی جے پی کو اقتدار سے باہر کر دیں گے۔ کسان غصہ میں ہیں کیوں کہ انہیں فصلوں کے واجب دام نہیں مل رہے۔ ملک کے نوجوانوں میں غصہ ہے کیوں کہ انہیں نوکری نہیں مل رہی۔ ملک میں دلتوں کو پریشان کیا جا رہا ہے۔‘‘

جن آکروش ریلی کے لئے ممبئی سے روانہ ہوئی ٹرین ابھی تک دہلی نہیں پہنچی ہے۔ مقررہ وقت کے مطابق الصبح 3 بجے ٹرین کو دہلی پہنچنا تھا۔ کانگریس کی طرف سے اس کی شکایت ریلوے کے وزیر سے کر دی گئی ہے۔ کانگریس کا خیال ہے کہ جان بوجھ کر ٹرین کو روکا گیا ہے۔

ملک میں خواتین کے تئیں ہو رہے جرائم اور عصمت دری کا اثر کانگریس کی جن آکروش ریلی میں صاف نظر آرہا ہے اور کارکنان کے ہاتھوں میں پلے کارڈ اور بینر تھامے ہوئے ہیں۔ جن آکروش ریلی میں بڑی تعداد میں خاتون کارکنان حصہ لے رہی ہیں۔

جن آکروش ریلی میں فرید آباد سے تشریف لائیں کانگریس کی کارکنان، دیکھیں ویڈیو

کانگریس کی جن آکروش ریلی میں ملک بھر سے کانگریس کارکنان شرکت کے لئے دہلی پہنچے ہیں۔ تمل ناڈو کانگریس کمیٹی اقلیتی شعبے کے صدر ڈاکٹر جے اسلم باشاہ بھی اپنے معاونین کے ریلی میں موجود ہیں۔

جن آکروش ریلی میں لکھنؤ سے پہنچے ایک شخص نے کہا ’’ہم نے 2014 میں مودی کو ووٹ دیا لیکن تمام خواب ٹوٹ گئے۔ انہوں نے ہمارے پیسے چھین لئے اور ہمیں غریب بنا دیا۔‘‘