راجستھان کا سرکاری اسپتال 6 ماہ میں ہی ہوا بے حال، دیواروں پر شگاف ظاہر، علاج کرانے پہنچ رہے لوگ خوفزدہ

راجستھان کے کوٹہ شہر میں نو تعمیر سرکاری ذیلی ہیلتھ سنٹر کی عمارت کچھ ماہ میں ہی مخدوش دکھائی دے رہی ہے۔ عمارت کی دیواروں میں جگہ جگہ شگاف دکھائی دے رہے ہیں، جس سے تعمیرات میں بدعنوانی کی قلعی کھل گئی ہے۔ یہاں 41 لاکھ روپے کے خرچ سے تیار اس ذیلی ہیلتھ سنٹرل کی عمارت 6 ماہ میں ہی بدحال ہو گئی ہے۔ حالات ایسے ہیں کہ مقامی لوگ جب اپنا علاج کرانے پہنچتے ہیں تو ان پر کسی انہونی حادثہ کا خوف طاری رہتا ہے۔ لوگ اس ذیلی ہیلتھ سنٹر میں علاج کرانے سے ڈر رہے ہیں۔ بتایا جا رہا ہے کہ اس نو تعمیر عمارت کی ہر دیوار میں شگاف صاف دکھائی دے رہا ہے۔

اس ذیلی ہیلتھ سنٹر کو دیہی آبادی کو طبی سہولیات دستیاب کرانے کے لیے تیار کیا گیا تھا۔ جنوری 2025 میں اس عمارت کو عوام کے حوالے کیا گیا تھا، لیکن سرکاری سطح پر ہوئی تعمیر کی قلعی 6 ماہ میں ہی کھل گئی۔ عمارت کی دیواروں میں بری طرح سے شگاف پیدا ہو گیا ہے۔ کئی جگہ پر چھت سے پانی بھی ٹپکنے لگا ہے۔ عالم یہ ہے کہ عمارت میں کب حادثہ ہو جائے، اس کا بھروسہ نہیں ہے۔ لوگ عمارت میں داخل ہونے سے پرہیز کر رہے ہیں۔

لوگوں نے الزام عائد کیا ہے کہ 41 لاکھ روپے خرچ کر تیار ہوئی اس عمارت کی تعمیر میں بڑا گھوٹالہ ہوا ہے۔ اس معاملے میں ذیلی ہیلتھ سنٹر کی انتظامیہ کچھ بھی کہنے سے پرہیز کر رہی ہے۔ ایسا لگ رہا ہے جیسے وہ کسی بھی ذمہ داری سے بچتے نظر آ رہے ہیں۔ لوگوں کا کہنا ہے کہ اس اسپتال کی تعمیر میں گھٹیا سامانوں کا استعمال کیا گیا ہے۔ اسی وجہ سے عمارت میں دراڑیں پیدا ہو گئی ہیں۔ اگر محکمہ کے ذمہ دار افسر نے اس پر توجہ نہیں دی تو گھٹیا تعمیر کے سبب کبھی بھی حادثہ ہو سکتا ہے۔ کچھ لوگوں نے اس تعمیری عمل کی جانچ کرانے اور قصورواروں کے خلاف کارروائی کرنے کا مطالبہ کیا ہے۔